Nuannaarutigaara Knud Rasmussenip Højskoliata ukiunik 45-iliinerata nalliussineqarnerani KANUKOKA sinnerlugu najuussinnaagama. Ukiuni 45-ni Knud Rasmussenip Højskolia atoreerpoq. Pilersinneqarpoq inunnik inuiaqatigiinni pissutsinik soqutiginnillutik inuusuttut inuttut ineriartorfigisinnaasaannik ”inuunerup atuarfia”-nik taasaminnik pilersitserusuttut suliaasa nersortariaqartut sikkernerattut.

 

Ukiuni taakkunani suliffik una illoqarfimmut Sisimiunuinnaanngitsoq inuusuttuullutilli ingerlariaqqiffissaminnik nalornisimasunut aallariarfittut pingaartutut eqqaamaneqartarpoq.

 

Neriuppunga ”inuunerup atuarfia”-tut sulineq ingerlateqqinneqassasoq inuusuttut ingerlariaqqinnissaminni inuuneq tunissutaasoq qujamasuutigalugu inuiaqatigiinni malinnaallutik isumalluarfigisinnaasatsinnik suleqataanissaminni piareersarfissaat.

 

KANUKOKAp kommunini inulerisunut pikkorissaasarnermini Højskoli atorlugu ingerlassisarnermini manna iluatsillugu sulisut qujaffigerusuppai inussiarnersumik, kalaalerpalaartumik eqeersimaartumillu sullissinermik takutitsisarnerat pillugu.

 

Nalunngilara Højskoli suli annerusumik sunniuteqarnissaminik kissaateqartoq mannalu iluatsillugu ilinniartitsisut forstanderilu pilluaqquutigalugit sulilluarnissaannik suleqatigiilluarnissaannillu kissaatissavakka.

 

Inuiaqatigiit silarsuup sinneranut akuujuartussaavugut nunatsinnilu ineriartorneq naleqqussartuartussaavarput avataani pisut atorsinnaasatsinnik ilinniarfigalugit. Nuannaarutigaara ilinniartusi nunanut allanut angalanissaanik periarfissittarniarlugit suliaqarassi. Ilinniartut tulliit inuiaqatitsinnik Canadamiunik tikeraagaqarniartut tapiissuteqarfigalugit annikikkaluartoq una aningaasaq tunniuppara.