Inatsisartunut Naalakkersuisunullu
allakkat ammasut
København, ulloq 15. marsi 2007
Kalaallit Nunaanni borgmesterit marsip 14-iani 2007 ataatsimiinnerminni oqaluuseraat Naalakkersuisut aaqqissuussaanermik iluarsaaqqinnermi sulinerup killiffianik nassuiaataat . Nassuiaat taanna Inatsisartut suliamik oqaluuserinninnerannut tunngaviuvoq kommuninullu tusarniaassutigineqarsimanani. Nassuiaat tunngavigalugu paasinarpoq tunngavissat arlalitsigut allannguuteqartut, taamaattumillu borgmesterit isummerput kommunit kattunnissaannnut naalakkersuisut piffissaliussaat iluarsineqartariaqartoq januaarip aallaqqaataani 2009-mi pinnani januaarip aallaqqaataani 2010 pisussanngorlugu.
Namminersornerullutik Oqartussat suliassaqarfinnik kommuninut tunniussinissaannik inassutit ilaat Aaqqissuussaanermut Isumalioqatigiissitat isumaliutissiissutaannik aallaaveqanngillat, taamalu suliassaqarfiit kommuninut pingaaruteqarluinnartut ilaat nassuiaammi taaneqanngivipput. Aamma suliassaqarfiit ilaat Namminersornerullutik Oqartussaniiginnartussatut inassutigineqarput naak Aaqqissuussaanermut Isumalioqatigiissitat kommuninut tunniunneqaqqugaluaraat.
Piffissami ikaarsaariarfiusumi immikkut aningaasartuutissat kommunit akuutinnagit aalajangersarneqarsimapput. Borgmesterilli toqqissisimanartinnginnerusaat tassaavoq sipaarutaasinnaasunut 218 mio. kr.-inut Aaqqissuussaanermut Isumalioqatigiissitat tunngaviliussaata Naalakkersuisunit isummerfigineqarsimannginnera. Tamatumunnga tunngatillugu taasariaqarpoq Naalakkersuisut namminneerlutik sipaarutaasinnaasunut tunngavissanik allanngortitseqataasarsimanerat – tamatumani ilaatigut eqqarsaatigalugit akileraartitsisarnermi suliat eqiterneqarnerat, Ombudsmandeqarnerup sipaarutaasinnaasutut attorniarneqannginnera kiisalu kommunini suleriaatsit qarasaasiaqarnikkut automatiseererneqarnissaannut aningaasaliisoqannginnera.
Borgmesterit erseqqissarusuppaat aaqqissuussaanermik iluarsaaqqinnissaq tamakkiisumik tapersersoramikku aammalu kommunit kattukkusullutik kissaatigisartik aalajangiusimammassuk.
Kisianni maanna kommunalbestyrelsiusut atuuffiat qaammatinik sisamanik sivikillillugu januaarip aallaqqaataani 2009-mi kattussuinissamik piffissaliinerup ajunngitsumik malinneqarsinnaanera piviusorsiortutut isumaqarfiginngilaat, taamaattumillu isumaqatigiissutigineqarpoq iluarsaaqqinnerup aallartinnissaa isumannaannerussasoq 1. januaari 2010-mut iluarsineqaruni.
Taamatut aalajangerneq borgmesterit najuuttut isumaqatigiilluinnarneratigut pivoq.
Borgmesterit sinnerlugit
Simon Simonsen
Naalakkersuisut siulittaasuata oqaaseqaammut akissutaa - una tooruk
