Atuagassiaq tassaavoq kommuneqarfiit kattuffiata innuttaasunut paasisitsiniaanermut tapersiissutaa, taamaalillutik pisortat suliassaqarfiisa aaqqissuussaanerannik iluarsaaqqinnissaq pillugu tunngaviusutigut paasissutissarsisinnaaniassammata kommunerujussuanngortussat politikkikkut siulersuisussaannik qinersinissaq 8. apriili 2008 pisussaq sioqqullugu.
"Kommunit nutaat" normu 2 naqitertinneqassamaarpoq 2008-mi februaarip naalernerani. Tassani malittareqqinneqassapput normumi siullermi sammineqartut: Ikaarsaariarnermi ataatsimiititaliassat suunersut kiffartuussinernillu assigiissaarineq qanoq paasisariaqarnersoq aammalu innuttaasut kiffartuunneqarnerat qanoq pilersaaruteqarfigineqarnersoq suliassaqarfiillu suut kommunit Namminersornerullutik Oqartussanit tigussagaat takorloorneqarnersoq.
KANUKOKA-p siulittaasuata Søren Alaufesenip atuagassiami allaaserisamini innuttaasut kajumissaarpai peqataaqqullugit pisussanillu alaatsinaalluaqqullugit. "Tassami kommunit kattunnissaat aatsaat ukioq ataaseq qaangiuppat pisussaagaluartoq kommunerujussuanngortussani politikkikkut aqutsisussat upernaaru apriilimi qinerneqareertussaapput," Søren Alaufesen allappoq.
KANUKOKA-p siulittaasuata aamma oqaatigaa aaqqissuussaanermik iluarsaaqqinnissap annertuup piareersarneqarnera pillugu KANUKOKA-p ataavartumik paasissutissiisarnera maannamut kommunini politikerinut sulisunullu sammitinneqarnerusimasoq, ilaatigut kattuffiup nittartagaa nutaarsiassanillu allakkiat atorlugit. Innuttaasunut toqqaannartumik attaveqarneq kommunit ataasiakkaat susassarinerummassuk tamanna annerusumik aallunneqarsimanngilaq.
Atuagassiarli pineqartoq KANUKOKA-miit saqqummersinneqarpoq upernaaru qinersinissaq sioqqullugu paasissutissanik tunngaviusunik innuttaasut pissarsinissaminnut periarfissaqarnissaannut tapersiissutitut.
”Kommunit nutaat” AG-mut Sermitsiamullu ikillugu siammarneqassaaq, aammalu kommunit allaffiisa saaffiginnittarfiini kommunillu nunaqarfinni allaffiini pineqarsinnaassalluni.
Inussiarnersumik
Martha Labansen
direktør
