23. aggusti 2007
Akileraaruseriffiit qitiusumut nuunneqarnerat, akiliisitsiniartarnerup qitiusumut nuunniarneqarnera akisussaaffinnillu kommuninut nuussiniarneq pillugit oqaaseqaatisi pillugit
Akileraaruseriffiit qitiusumut nuunneqarnerat akiliisitsiniartarnerullu qitiusumut nuunniarneqarnera pillugit oqalliseqataanersi qujaruppara, tassami sapinngisamik amerlasuut tamatuminnga oqalliseqataaneratigut kommunit suliassaannik arsaartuinerup iluanngequtai nuna tamakkerlugu politikkikkut maluginiarneqarnerulersinnaammata.
KANUKOKA-p naalakkersuisut piffissami sivitsulersumi tamakku pillugit uteriiserfigisarsimavai, tamatumalu kingunerisaanik naalakkersuisunut ilaasortat assigiinngitsut pineqartunut akisussaasut ataatsimeeqatigisarsimallugit. Taakku tamarmik ajornartorsiutinut KANUKOKA-p saqqummiussaanut paasinnillutik oqaaseqartarsimapput, taamaakkaluartorli inatsisissanik piareersaaneq qitiusumullu nuussinissamik pilersaarutit ingerlanneqaannarpasipput.
Akileraaruserinerup qitiusumut nuunneqarneratigut kommunit akileraarutitigut isertitanik ingerlaavartumik nalilersuinissaq ajornakusoortilersimavaat, kommunillu arlallit tigoriaannarnik aningaasaqarniarnerat ajorsisimavoq aningaasat ingerlaarnerata allanngorneratigut. Tamatumunnga tunngatillugu KANUKOKA Aningaasaqarnermut Pisortaqarfimmik, Akileraartarnermut Pisortaqarfimmik aamma Aasiaat Kommuniannik isumaqateqarsimavoq Aasiaat Kommunianni tigoriaannarnik aningaasaqarnerup aningaasallu ingerlaarnerata peqatigiilluni sukumiisumik misissorneqarnissaannik, akileraaruserinerup qitiusumut nuunneqarneratigut allannguutit taamaalillutik nalunaarsorneqarniassammata. Aasiaat Kommunianni misissuineq kommunini allani taamatuttaaq misissuinissamut tunngaviliisuussaaq, paasinarsissappallu kommunit tigoriaannarnik aningaasaqarniarnerat qitiusumut nuussinerup qajannarsisissimagaa, taava taarsiiffigineqarnissamik piumasaqartariaqassaagut.
KANUKOKA ullut tamakkiapajaarlugit Akileraartarnermut Pisortaqarfimmut attaveqartarsimavoq akileraarutitigut ingerlaavartumik isertitat pillugit paasisaqarnerorusulluni, aasaaneranilu sulinngiffeqarnerit sioqqullugit pisortaqarfimmut tamanna pillugu allagaqarluni. Tamatuma kingunerisaanik Akileraartarnermut Pisortaqarfik nalunaarpoq kommunini maanna pissusiulersut ajuusaarutigalugit, ilisimatinneqarpugullu ajornartorsiutaalersut qanoq pineqarnissaata erniinnaq nalunarunnaarnissaa ilimagineqartoq assullu pingaartinneqartoq.
Tassa Kujataani Kommunit Peqatigiiffiata isornartorsiuinera isumaqatigilluinnarparput, matumuunalu allagaqarluta erseqqissarumavarput KANUKOKA-p pissutsit eqqumaffigilluarai.
Kujataani Kommunit Peqatigiiffiata aamma ilisimatitsissutigaa aaqqissuussaanermik iluarsaaqqinnissamut atatillugu suliassaqarfinnik kommuninut tunniussuinissap pilersaarusiorneqarnissaata nukinginnarsinera. Tamatumunnga tunngatillugu KANUKOKA suliaqarsimavoq suliap tamatuma qanoq piffissalersorneqarnissaanik siunnersuummik, Namminersornerullutik Oqartussanut nassiunneqareersumik. Siunnersuut pillugu suli akissutisinngilagut, aalajangersimallutali allaffissornikkut aqutsisuutitat sapaatip-akunnerani uani tallimanngornermi ataatsimiinnissaanni piffissalersuusiaq taanna oqallisigineqassasoq. Pilersaarut taanna malillugu kommuninit paasisaqarfigineqarusuttut tassaapput: Meeqqanik inuusuttuaqqanillu paaqqinnittarfiit, innarluutillit isumagineqarnerat, PPR, annertusisamik immikkut atuartitsineq, imerajuttunik katsorsaaneq, sanaartorneq, ineqarneq, mittarfiit, umiarsualiviit kiisalu peqqinnissaqarfik.
Kaammattuutigineqarpoq suliaq septembarimi aallartinneqassasoq 2008-milu marsi aallartitsinnagu naammassineqassasoq. Taamatut piffissaliineqarpoq isumaqatigiinniarnerit inerneri kommunit 2009-mut missingersuusiornerminni ilaatissinnaaniassammatigit. Suliassaqarfiit makkua pillugit pilersaarusiornissap 2009-mi marsimi naammassereersimanissaa kaammattuutigineqarpoq: Attaveqaatit, nukissiorneq, pilersuineq, inuussutissarsiorneq, aalisarneq aamma avatangiisit – tassa kommunit qanoq tigusisinnaatiginerat piviusorsiortumik isiginiartariaqaratsigu, aamma kattunnissamut atatillugu suliap isumatusaartumik ingerlanneqarnissaa qulakkeertariaqarmat.
Piffissalersuusiami tassani KANUKOKA-p naatsorsuutigaa isumaqatigiinniarnerit ingerlanneqarnissaannut ilusissaq akuerineqareersimasoq atorneqassasoq suliassaqarfinnik tigooraanissap isumaqatigiinniutigineqartarnissaani. Imaappoq isumaqatigiinniutissatut siunnersuutit tamarmik immikkut ataatsimiititaliami aammalu allaffissornikkut aqutsisuutitani oqaluuserineqartassapput suliassaqarfiit ataasiakkaat pillugit suleqatigiissitat saqqummiussaat tunngavigalugit, taamaalillutik Ikaarsaariarnermi ataatsimiititaliat atuutilerneranni isumaqatigiinniutissatut siunnersuutit erseqqilluartut piareersimaniassammata.
Inussiarnersumik
Søren Alaufesen
KANUKOKA-p siulittaasua
