Maniitsup ukiunik 225-liinerani
Ukiut 25-t matuma siornatigut illoqarfik manna ukiunik 200-liisoq nalliuttorsiutigineqarmat Atuagagdliutini allaaserineqarpoq qulequtalimmik: “Ulloq pilluaqqusaasoq” – tassa taamani silagissorsuusimagami ullorlu nuannerluinnartumik ingerlasimalluni.
Qularutiginngilara maanna illoqarfiup ukiunik 225-liinerani ullut nalliuttorsiorfiusut qaangiuppata kingumut qiviarluni aamma taamatut oqartoqarsinnaassasoq: Ulloq pilluaqqusaasoq!
Tassami nalliuttorsiornermut atatillugu pisussanik pilersaarutit qimerlooraanni nalunanngilaq nalliuttorsiortitsisut kissaatigigaat ullut puigunaatsuussasut maanilu najugaqartunut sapinngisamik amerlanerpaanut nuannaarutaassasut.
”Inuunermi nuannersut amerlaqimmata …” – taalliortutta ilaata erinarsuusiaa nalunngilluagarput taama aallartippoq. Taannaqa oqarpoq!
Ukiut ingerlaneranni inuuniarnermi pissutsit allanngorarsimapput. Illoqarfiup matuma misigisimavai ukiut inuussutissarsiornikkut ingerlalluarfioqisut, aalisartut eqeersimaartut aalisakkerivimmilu sulisartut sullerissut ulapaarfigisaat. Aammali illoqarfik ukiunik inuussutissarsiornikkut kinguariarfiusunik, aningaasarsiornikkut unittoorfiusunik suliffissaaruffiusunillu, misigisaqarsimasoq nalunngilarput. Taamaattorli malunnarpoq maani innuttaasut isumalluarneq ilatsiinnannginnerlu siuliminnit kingornussimasartik attatiinnaraat. Taamaassaaq – inuunermi nuannersut amerlaqimmata!
Neriuppunga ukiunik akunnaatsuliineq manna atorluarneqassasoq isumalluartumik isummeriartaaseqarnerup tamatuma suli annerusumik uummarissarnissaanut.
Kommuneqarfiit kattuffianni siulittaasutut qaaqqusaanera maanilu najuussinnaanera tulluusimaarutigaara. Mannalu iluatsillugu eqqarsaatissiissutitut eqqaalaarniarpara KANUKOKA-p oqallissaarutitut ukioq manna arlaleriarluni tusartittarsimasaa – tassa inuiaqatigiinni nutaaliaasuni, qarasaasiatigut attaveqaqatigiiffiusuni kikkullu tamangajammik kaasarfimmiortarissanik telefoneqarfigisaanni innuttaasut qanimut oqartussaaqataanerat qanoq ineriartortinneqarsinnaanersoq.
Aaqqissuussaanermik iluarsaaqqinnissamut atatillugu nunaqarfinni aqutsisoqarnerup atatiinnarneqarnissaa sumiiffinnilu sinniisoqarnerup nutaatut pilersinneqarnissaa kommuneqarfiit kattuffiata tunngaviusutigut tapersersugarai.
Qanorluunniilli aaqqissuussisoqaraluarpat nutaamillu pilersitsisoqarluni, sumut iluaqutaassava nunaqarfinni aqutsisut sumiiffinnilu sinniisut oqartussaaffeqanngippata? Tassa apeqqut pingaarneq. Aaqqissuussinissami nutaami isorartoqisunik kommuneqarfiusussami sumiiffinni oqartussaaqataaneq ajornerulersinnagu akerlianilli imaqarnerulersillugu nukittunerulersillugulu qanoq ineriartortissinnaavarput? Qularinngilara maniitsormiut apeqqutip tamatuma akissutissarsiornerani tunniussassaqarluassasut.
Taamatut eqqarsaatissiilaarlunga tamassi KANUKOKA sinnerlugu pilluaqquassi. Tunissutissannguaqarpunga kommunip arlaannut atorsinnaasaanik …
