Sumiiffinni oqartussaaqataaneq aaqqissuusseqqinnissami kommunerujussuarni sisamani pitsaanerusunik atugaqalissanerluni? Kattussuinikkut allaffissornerup pisariillisarneqarlunilu uumarinarnerulersinniarneqarnera qanimullu oqartussaaqataanerup ineriartortinniarneqarnera ataatsimoortinneqarsinnaappat?

 

Apeqqutit taamaattut namminneq qaffakaalersarput pisortatigut ingerlatsinerup aaqqissuussaaneranik iluarsaaqqinnissarsuaq qanillisoq eqqarsaatigileraanni. Apeqqutillu taakku ukioq manna 2007-imi immikkut soqutiginaateqarput, tassa Inatsisartut ukiaru ataatsimiinnissaminni isummerfigisussaammassuk sumiiffinni oqartussaaqataaneq 2009-imiit – tassa ukiut marluinnaat qaangi­uppata –  qanoq aaqqissuunneqassanersoq.

 

Aaqqissuussaanermut Isumalioqatigiissitat tamatumani siunnersuuteqarsimapput qinikkat arlariit marluinngortinneqarnerisigut pisariillisaanissamik, tassa Inatsisartoqassasoq aamma kommunalbestyrelseqassasoq. Ullumikkut qinikkat pingajuisa, nunaqarfinni aqutsisut, atorunnaarsinneqarnissaat siunnersuutigineqarpoq.

 

Taamaattorli Aaqqissuussaanermut Isumalioqatigiissitat atuisut siulersuisoqarnerannik taasaminnik isumaliutersuuteqarsimapput. Tamatumani pineqarpoq nammineq piumassuseq naapertorlugu pisariaqartitsinerlu tunngavigalugu sumiiffimmi suliffeqarfimmik imaluunniit suliffeqarfinnik arlalinnik siulersuisoqartitsisinnaaneq.

 

Isumassarsiaq taanna siorna ukiap ingerlanerani Namminersornerullutik Oqartussani uuttualaarneqarsimavoq, tamatumalu kingunerisaanik naalakkersuisut siulittaasuata saqqummiuppaa sumiiffinni sinniisoqarfinnik illoqarfinni nunaqarfinnilu pilersitsisinnaaneq, imarisamigut Aaqqissuussaanermik Isumalioqatigiissitat atuisut siulersuisuinik eqqarsaataannut assingusoq.

 

Tamatuma peqatigisaanik kommunit arlallit kattunnissaminnik aalajangernerminnut atatillugu nalunaaruteqarput nunaqarfinni aqutsisoqarnerup ataannarnissaa kissaatigalugu, nunaqarfiilli eqqaamioriit aqutsisuisa kattussinnaanerat periarfissaatillugu. Nunaqarfimmiut tungaanniit eqqarsaammik taamaattumik siusinnerusukkuttaaq saqqummersoqarpoq.

 

KANUKOKA kommuninik ataqatigiissitsisutut suli isumminngilaq periarfissat arlaat sorleq atorneqartariaqarnersoq imaluunniit periarfissat arlariit akuleriissinneqarsinnaanersut.

 

Pingaarnerpaaq tassaavoq sumiiffinni demokratiip imaqarluartumik ineriartortinneqarnissaa, imaappoq qinikkat oqartussaaffeqarluartitaanissaat. Kommunalbestyrelsit nutaat suliassaqarfinnik Nammi­nersornerullutik Oqartussanit tigusinermikkut ullumikkornit oqartussaaffeqarnerujussuusariaqarput, qujanartumillu tamanna iliuuseqarfiginiarneqalerpoq. Nunaqarfinnilu aqutsisoqarneq atatiinnar­neqassappat tamatuma imaqarluartuunissaa – imaappoq oqartussaaffeqartitaanissaa – qulakkeerneqartariaqarpoq, ullumikkut nunaqarfinni aqutsisut ikittuinnaat taasarialimmik oqartussaaffeqarmata.

 

Taamaattumik oqalliffiusinnaasut saqqummiiffiusinnaasullu tamaasa atorlugit tamakku pillugit oqallinnissamut kajumissaarivunga. Oqallisigisiuk qanoq aaqqissuussinissami nutaami isorartoqisunik kommuneqarfiusussami sumiiffinni oqartussaaqataaneq ajornerulersinnagu akerlianilli imaqarnerulersillugu nukittunerulersillugulu ineriartortinneqarsinnaanersoq. Suliffinni, atuarfinni ilinniarfinnilu, sulisartut inuussutissarsiortullu peqatigiiffiini, partiit immikkoortortaanni il. il. oqallittoqarniarli.

 

Oqallinnerup tamatuma ingerlanneqarnissannut periarfissat ilaattut KANUKOKA-p pilersippaa kattuffiup nittartagaani oqallittarfik www.kanukoka.gl/oqallittarfik . Ilanngussat siulliit, tassa kommunini politikerit allagaat, atuarneqarsinnaapput.

Oqallilluarisi.

Lars Karl Jensen
KANUKOKA-p siulittaasua