Aleqa Hammond aamma Søren Alaufesen 2009-mi kommuninut tapiissutissanik isumaqa-
tigiissutip atsiorneqarnerani.
Aningaasaqarnermut Nunanullu Allanut Naalakkersuisoq Aleqa Hammond aamma KANUKOKA-p siulittaasua Søren Alaufesen ullumi atsioqatigiipput 2009-mi kommuninut ataatsimoortumik tapiissutissat isumaqatigiissutigalugit. 2009-mi kommuninut ataatsimoortumik tapiissutit 830,6 mio. kr.-iussapput, taakkunannga 33,3 mio. kr. akit akissarsiallu qaffakkiartornerannut iluarsiissutaassallutik.
Illua’tungeriit isumaqatigiipput ilinniartitaanikkut immikkut iliuutsinut kommunit akileeqataassutissaat 2009-miit 77,7 mio. kr.-iussasut, tamannalu 2006-imi kommuninut ataatsimoortumik tapiissutit pillugit isumaqatigiissutip imarisaanik nangitsineruvoq.
Aaqqissuussaanermik iluarsaaqqinnissaq
Aaqqissuussaanermik iluarsaaqqinnermi suliassanik Namminersornerullutik Oqartussanit kommuninut nutaanut nussuisoqarnissaa naatsorsuutigineqarpoq, soorlu innarluutilinnik isumaginninneq, PPR / annertusisamik immikkut ittumik atuartitsineq, imerajuttunik katsorsaaneq sanaartornerlu eqqarsaatigalugit. Ilimagineqarpoq kommunerujussuanngortussat suliassanik taamaattunik Namminersornerullutik Oqartussanit aatsaat 1. januaari 2010-miit tigusiumaartut.
Aaqqissuussaanermik iluarsaaqqinnissamut atatillugu siunertaavoq innuttaasunik kiffartuussineq pitsanngorsarneqassasoq Namminersornerullutik Oqartussanut kommuninullu qarasaasiatigut attaveqarsinnaanerup piorsarneqarneratigut. Taamaattumik ”Pisortat ataatsimut IT-mik Aqutsisoqatigiivinik” pilersitsisoqarpoq Namminersornerullutik Oqartussat kommunillu peqataaffigisaannik. 2008-mut Aningaasanut inatsimmit ukiunut 2008-mut aamma 2009-mut tamanut Namminersornerullutik Oqartussat 5 mio. kr.-inik immikkoortitsisimapput. Illua’tungeriit isumaqatigiipput Ikaarsaariarnermi ataatsimiititaliat IT-mik aqutsisoqatigiinnik akuersinissaat aqutsisoqatigiinnullu ilaasortassanik toqqaanissaat apeqqutaatillugu ataatsimoortumik tapiissutissani tamarmiusuni 5 mio. kr.-inik inniminniisoqassasoq 2009-mi ineriartortitsinermut aningaasartuutissanut kommunit akileeqataassutissaannik.
Pissutsit allat
Isumaqatigiissut atsiugaq aningaasartaalu pillugit nassuiaatit atuarneqarsinnaapput www.kanukoka.gl-imi aamma www.nanoq.gl-imi. Paasisaqarnerorusukkaanni saaffigineqarsinnaapput kommitteret Peter Beck, tlf. 34 52 01, imaluunniit direktør Martha Labansen, tlf. 32 21 00.
