Ilaquttat, ikinngutit suleqatillu ilagalugit alianaatsumik katerisimaarnerit – ilaannilu ikeqattaartunik qilertaasalinnik nissiaqqatut nasartuullugu, qulleeqqat uiguleriissat, orpiliat kaavittartut, qilernerusat erinarsortartut allarpassuillu batteriitortut juullisiortarnernut ileqquliussanik akoqarluartunut ukiuni kingullerni akuliussimasut.
Batteriit tassaapput eqqakkat navianartut
Tamakkuarsuppassuit assigiissutigaat batteriitortuugamik – aammalumi attartungaatsiassanatik. Taavalu inngileeraq sulumminik aalataarisoq kusanarpallaarunnaaraangat, juulimaarlu qiimaqaluni eqquumminik equsaartitsiunnaaraangat taava igitassanngortarput, ajoraluartumillu eqqaavimmut ingerlaannaq iginneqarajuttarlutik.
Kisiannili igitassat tamakku nalinginnaanngillat – tassaaput eqqakkat NAVIANARTUT!
Batteriit tamakkuninnga ingerlatitsisut elektronikkertaallu aatsitassanik oqimaatsunik, soorlu kviksølvimik cadmiumimillu akoqarput avatangiisinut sakkortuumik toqunartuliisartunik. Tamakkua ikuallaavikkoorlutik eqqaavissuakkoorlutilluunniit avatangiisitsinnut anillaakkunik ilaatigut meeqqat peroriartornerinut ilikkarsinnaassusiannullu, uumasut inuillu kinguaassiorsinnaassusiannut ajoqusiinnaapput, kræfteqalissutaasinnaallutik….
….aamma aatsitassat oqimaatsut nunguneq ajorput – nerisariiaannermi eqiteruttarput kimittoriartortarllutillu.
Batteriiarannguit immaqa naviananngitsutut isikkoqarsinnaagaluarput – kisianni amerlasoorujussuupput, taavalu ikuallaavimmut eqqaavissuarmulluunniit annguppata sananeqaatit navianartut tamakkunaniittut avatangiisitsinni siammassapput.
Batteriit tunniussigit
Taamaammat tamakkunani batteriit elektronikkillu peerlugit karsiusanut batteriinik katersuivinnut, kommunit katersuisitsinerannut Batteriit tunniusigit!-mut atatillugu illoqarfinni/nunaqarfinni tamani tamaani inissitsiterneqarsimasut ilaannut tunniunnissaat pingaartuuvoq.
- imaluunniit tamakku tigooraavinnut tunniunneqarsinnaapput, tassanngaanniit isumannaatsumik passunneqassammata.
Immaqaluunniit suliffissinni ataatsimoorullugu tamakku katersorlugit tunniussinnaavasi, taava sulisunut suli ajornannginnerussammat pinngortitaq batteriiutissinnit mingutsinneqanngitsoq ilisimaaralugu juullisiornissaq.
Ajornanngingaarmat puigoqqajaanarsinnaavoq!
Kommunip katersuisitsinera avatangiisinillu mianerinninnera pillugu annertunerusumik paasisaqarusukkusi – taava Zenica Gosvig Larsen, Suliniut Kommunini Avatangiisit, attavigisiuk zegl@kanukoka.gl , oqarasuaat 36 21 00 – lokal 112.
Juullimi pilluaritsi
Enok Sandgreen
siulittaasoq
