Kalaallit Nunaanni Kommuneqarfiit Kattuffiannut aallartitat ataatsimiinnerminni siulittaasumik nutaamik siulersuisunillu nutaanik qinersipput kattuffimmi 1. oktobari 2008-miit politikkikkut aquttuulersussanik.

 

Siulittaasumut qinigaavoq Enok Sandgreen (Siumut). Siulersuisunut qinigaapput Ane Egede Mathæussen (Siumut), Ove Karl Berthelsen (Inuit Ataqatigiit), Bendt B. Kristiansen (Inuit Ataqatigiit) aamma Søren Alaufesen (Atassut). Taaneqartoq kingulleq 2007-imi upernaakkut aallartitat ataatsimiinneranni siulittaasunngorpoq.

 

Siulersuisortaat inissitsiterlutik ataatsimiinneranni Søren Alaufesen siulittaasup tulliatut siullertut Ove Karl Berthelsenilu siulittaasup tulliata aappaatut qinigaapput.

 

Borgmesterip kattuffiup siulersugaanerani sunniuteqarsinnaanerat nukittorsarumallugu aallartitat Ilulissani ataatsimiinnerminni aalajangerput kommuninngortussani sisamaasuni borgmesterit siulersuisuni aalajangersimasumik ataatsimeeqataasassasut (taasisinnaatitaanatik). Taakkulu sisamat siulersuisortaat inissitsiterlutik ataatsimiinneranni peqataapput, tassaasut: Simon Simonsen (Kujataa), Asii Chemnitz Narup (Kangia/Kitaa), Hermann Berthelsen (Qeqqa) aamma Jess Svane (Avannaa).

 

 

KANUKOKA'p siulersuisortaavi kommunerujussuanngortussanilu sisamani borgmesteriusussat siulersuisuni aalajangersimasumik ataatsimeeqataasartussat. Salliit saamerlermiit: Kangia/Kitaani borgmesteriulersussaq Asii Chemnitz Narup, siulersuisunut ilaasortaq Ane Egede Mathæussen, Kujataani borgmesteriulersussaq Simon Simonsen. Tunorliit saamerlermiit: Siulersuisunut ilaasortaq Bendt B. Kristiansen, siulittaasup tullia siulleq Søren Alaufesen, siulittaasoq Enok Sandgreen, siulittaasup tulliata aappaa Ove Karl Berthelsen, Qeqqani borgmesteriulersussaq Hermann Berthelsen aamma Avannaani borgmesteriulersussaq Jess Svane.