Østre Landsret 1. septembari 2008-mi aalajangiivoq Kimik IT A/S ingerlatseqatigiiffimmilu tassani aktiaatillit ataatsimoorlutik Kalaallit Nunaanni Kommuneqarfiit Kattuffiannut KANUKOKA-mut 10 mio. kr.-inik, taakkununnga ernialiussanik eqqartuussisulersuussinermilu aningaasartuutinik 1,4 mio. kr.-inik akiliisussanngorlugit. Akiliiffissaq 15. septembari 2008-mut killilerneqarpoq.
Eqqartuussisulersuussinermi pineqarpoq qarasaasiaqarfiup KANUKOKA Informatik-ip ingerlatseqatigiiffittut namminersortutut Kalaallit Nunaanni Kommuneqarfiit Kattuffiannit avissaartinneqarnerata kingorna 1998-imi IT-mik ingerlatseqatigiiffimmik pilersitsinermi eqqunngitsuliortoqarsimanera.
Østre Landsretimi eqqartuussisut eqqartuussumminni erseqqissaapput KANUKOKA-mi sulisuusimasut taama pisinnaatitaanngilluinnarlutik kattuffiup Kimik IT A/S-imi piginneqataassutinik amerlanernik piginneqataalerniarnera akornusersorsimagaat.
Eqqartuussutip tusarliunneqarnerata kingorna ullualuit qaangiuttut ingerlatseqatigiiffiup advokatia KANUKOKA-p direktørianut saaffiginnissimavoq akiliinissap ullunik 14-inik kinguartinneqarnissaa, ernianik isumakkeerinissaq immaqalu naafferartumik akiliioraanissamik aaqqissuussinissaq qinnutigalugit.
Kalaallit Nunaanni kommuneqarfiit Kattuffiata siulersuisui 11. septembari 2008-mi ataatsimiinnerminni isumaqatigiillutik aalajangerput qinnuteqaat tamanna ilassiumanagu. Siulersuisut erseqqissaapput suliaq eqqartuussut naapertorlugu ingerlanneqassasoq, aammalu suliaq pillugu apeqqutaasinnaasut Kimik IT A/S-ip advokatiata KANUKOKA-llu advokatiata akornanni oqaloqatigiissutigineqartassasut.
Kalaallit Nunaata Eqqartuussiviata marsimi 2006-imi maannalu Østre Landsretip tamarmik kattuffimmut annertuumik taarsiiffigineqartussanngortitsisimanerat KANUKOKA-p siulersuisuisa innersuussutigaat.
Taasariaqarportaaq Kimik IT A/S-ip taarsiissuteqaqquneqarluni eqqartuussisulersuunneqarnissaata Kalaallit Nunaanni Kommuneqarfiit Kattuffiannut aallartitat ataatsimiinneranni tamanit isumaqatigiissutigineqarsimanera. Isumaqatigiissuteqarnikkut inaarisinnaaneq siusissukkut KANUKOKA-mit sulissutigineqalersimagaluarpoq. Tamannali Kimik IT A/S-ip soqutigisimanngilaa. Kingusinnerusukkut aallartitat ataatsimiinneranni aamma tamanit isumaqatigiissutigineqarpoq isumaqatigiinniuteqartoqassanngitsoq, piumasarineqarlunili suliassaq eqqartuussivimmi aalajangiiffigineqassasoq. Taamaalillutik siulersuisut pisinnaatitaanngillat taarsiissutissat, eqqartuussisulersuussinermi aningaasartuutit ernialiussalluunniit pillugit ingerlatseqatigiiffimmik isumaqatigiissuteqarnissaminnut.
Pingaartumik Kalaallit Nunaata Eqqartussiviata 8. marsi 2006-imi aalajangiinerata kingorna IT-mik ingerlatseqatigiiffiup pineqartup nammineq isumaqatigiissuteqarfigisimasaasalu eqqartuussutip taamaattup aningaasatigut ajornartorsiulernermik kinguneqarsinnaanera ilisimaarisimavaat. Taamaakkaluartoq siulersuisut maluginiarpaat Kimik IT A/S-ip 23. maaji 2008-mi ataatsimeersuarnerani iluanaarutinik 1,5 mio. kr.-inik agguagassanngortitsisoqarsimasoq – tassa Københavnimi Østre Landsretimi eqqartuussutissamik aalajangiinialerneq sioqqutilaaginnarlugu.
Kommunit Kimik IT A/S-imit sullinneqartut ingerlatseqatigiiffiup atorunnaarsinnaaneranut sillimmartaarnissaat siulersuisut kaammattuutigaat.
Inussiarnersumik
Søren Alaufesen
siulittaasoq
