Tusagassiuutitigut eqqartorneqareersutuut KANUKOKA-p Kimik IT A/S-ip akiliisinnaajunnaartutut nalunaarutigineqarnissaanik sulissutiginninini tunuartippaa suliassap Kalaallit Nunaata Eqqartuussiviani 26. septembari 2008-mi suliarineqalernera sioqqutitsiarlugu ingerlatseqatigiiffik ilisimatitsimmat Østre Landsretip eqqartuussutaa malillugu akiliutigeqquneqartut akilerniarlugit.
Kommuninut aamma ikaarsaariarnermi ataatsimiititalianut allagaqarluni KANUKOKA-p direktøriata Martha Labansenip uppernarsarpaa kr. 17.089.814,31 maanna akiliutigineqarsimammata, tassaasut taarsiissutigeqquneqartut 10 mio. kr., taakkua erniaasa kiisalu eqqartuussisulersuussinermi aningaasartuutit 1,4 mio. kr. katinneri.
Kalaallit Nunaanni Kommunit Kattuffiannut aallartitat aalajangigassaraat aningaasat taakku qanoq atorneqassanersut. Taamaattumik kattuffiup siulersuisortaavisa kommuninilu nutaani borgmesterinngortussat piffissami aggersumi oqaloqatigiissutigiumaarpaat tamanna pillugu qanoq siunnersuuteqassanerlutik.
