Kommunerujussuanngortussani sisamani kommunalbestyrelsiulersussanik qinersinissaq marlussunnik apeqqutissaqarnarpoq maannakkut kommuniusut sumiiffiit sinniisuutitaannik taaneqartunik sinniisoqartitaanissaannut tunngatillugu. Aaqqissuussineq tamanna piffissamut qinersiviusumut siullermut atuukkallartussaasoq pisortat suliassaqarfiisa aaqqissuuteqqinneqarnissaat pillugu Inatsisartut immikkut inatsisiliaanni ilaatinneqarpoq, tassa politikkikkut kissaatigineqarmat kommunini nutaani isorartoqisunik nunataqartussani sumiiffiit sinniisoqarluarnissaat qulakkeerneqassasoq.
Aaqqissuussineq taanna taamaallaat immikkut inat-sisiliakkut atuukkallarpoq, tassa qinersisarnermut i-natsit suli nutarterneqanngimmat.
Kommunit maannamut atuuttut (imaluunniit immik-kut inatsisiliami allassimasutut „kommuniusimasut") tamarmik sumiiffinni sinniisuutitaqassaput.
Imaappoq Avannaata kommuneriligassaa kommuninit arfineq-pingasunit katitigaassammat tassani kommunalbestyrelsiulersussamut ilaasortat katillutik 21-usussat ilaat arfineq-pingasut tassaassapput sumiiffinni sinniisuutitat. Qeqqata kommunia kommuninit marlunnit katitigaassammat tassani kommunalbestyrelsimut ilaasortat katillutik 15-iusussat ilaat marluk sumiiffinni sinniisuutitaassapput. Kangia/Kitaata kommuniani ilaasortat 21-iusut ilaat tallimat, Kujataatalu kommuniani ilaasortat 15-iusut ilaat pingasut sumiiffinni sinniisuutitaassapput.
Kikkut sumiiffinni sinniisuutitaassappat?
Namminersornerullutik Oqartussat Nunami Namminermi Pissutsinut Allaffeqarfiat inatsisinik qinersinermut tunngasunik ingerlatsisuusoq KANUKOKA-mut imaattunik uppernarsaavoq:
· Sumiiffiup sinniisuutitaa tassa partiimi imaluunniit kattusseqatigiiffimmi taaguunneqarnerpaami qinigassanngortitaq taaguunneqarnerpaaq.
· Qinigassanngortitaq taanna maannakkut kommunerisamini najugaqartuussaaq.
· Qinigassanngortitap maannamut kommunerisaani najugaqarfigisaanilu taasinerit kisimik sumiiffiup sinniisuutitaatut qinigaassutigineqarsinnaapput.
Sumiiffinni sinniisuutitat taamatut inissinneqareerpata ilaasortaaffiit sinneri partiinut kattusseqatigiinnulluunniit taaguunneqarnerpaanut agguataarneqassapput taakkua qinigassanngortitaannut taaguunneqarnerpaanut.
Nunami Namminermi Pissutsinut Allaffeqarfik maanna ilitsersuusiorluni naammassilerpoq apriilip arfineq-pingajuani kommunini ataasiakkaani qinersinissami siulersuisut atugassaannik.
Kisitsisit 2005-imeersut tunngavigalugit naatsorsuineq
Qinersisarnermi malittarisassat nutaat takorlooruminarsisikkumallugit KANUKOKA kingullermik kommuninut qinersinermi 2005-imi 5. apriilimi pisumi inernerit tunngavigalugit misiliivoq kommunalbestyrelsiulersussat nutaat qanoq katitigaassagaluarnerannik takussutissiorluni. Tassani soorunami eqqarsaatigineqanngilaq 2005-imi qinigaasut ilaasa assigiinngitsunik pissuteqarlutik kingorna ilaasortaajunnaarsimanerat. Aamma eqqarsaatigineqanngilaq taamani qinigaasut ilaasa kingorna politikkikkut suleqatigiinni inissisimaffimminnik allanngortitsisimanerat.
Naatsorsuinerit taakku tamarmiutillugit quppernerup matuma ataani pineqarsinnaapput. Qinigassanngortittut allattorsimaffii takutinneqartut tassaapput Namminersornerullutik Oqartussat qinersinermit nalunaarsuiffianni allattukkat assilineri.
Naatsorsukkat naapertorlugit kommunalbestyrelsini nutaani ilaasortaaffiit partiinut agguataarnerat imaassagaluarpoq taaneqareersutut 2005-imi qinersinerup inerneri tunngavigissagaanni:
Kujataata kommunia
(kommunalbestyrelsimut ilaasortat 15-it)
| Atassut | 2 |
| Demokraatit | 1 |
| Inuit Ataqatigiit | 4 |
| Siumut | 8 |
Kangia/Kitaata kommunia
(kommunalbestyrelsimut ilaasortat 21-t)
| Atassut | 3 |
| Demokraatit | 5 |
| Inuit Ataqatigiit | 4 |
| Siumut | 8 |
| Kattusseqatigiit 1 (IVI) | 1 |
Qeqqata kommunia
(kommunalbestyrelsimut ilaasortat 15-it)
| Atassut | 3 |
| Demokraatit | 2 |
| Inuit Ataqatigiit | 3 |
| Siumut | 7 |
Avannaata kommunia
(kommunalbestyrelsimut ilaasortat 21-t)
| Atassut | 5 |
| Inuit Ataqatigiit | 5 |
| Siumut | 9 |
| Kattusseqatigiit nr. 1 | 2 |
Taasinerit siammartarnerat
eqiteruttarneralluunniit
Taasinerit agguataarneqarnerannik tamatumalu ilaasortaaffinnik agguataarinermut qanoq sunniuteqarsinnaaneranik misissuataarineq soqutiginartunik paasisaqarfiusinnaavoq.
Soorlu Kujataata kommuniani kommunalbestyrelsimut ilaasortaaffiit agguataarneqarnerat misissoraanni maluginiarnarpoq maanna Narsap kommuniata arfinilinnik ilaasortaatitaqarnermigut allanit sinniisoqarluarnerunera. Nanortallip kommunianit qinigassanngortitat marlunnik inissarsisimapput Qaqortullu kommunianit qinigassanngortitat arfineq-marlunnik. Inuttussuseq tunngavigalugu agguataarissagaanni ima agguataassagaluarput: 4-4-7.
Qinigassanngortitat ataasiakkaat qanoq taaguunneqartiginerata aamma sunniuteqartarnera tassani erserpoq. Tassa taasinerit qanoq siammarsimatiginersut katersuussimatiginersulluunniit.
Taasinerit partiinut assigiinngitsunut agguarsimanerat suleqatigiikkuutaat nukittussutsimikkut inissisimanerannut immini takussutissaavoq. Narsarmiulli qinigassanngortitaat ilaasortaaffissanik nutsuilluarnerusimapput arlalinnik taaguunneqarluartunik ilaqaramik. Nanortalimmit qinigassanngortitat ataasiakkaatut isigissagaanni iluatsinnginnerupput taasinerit siamasinnerummata qinigassanngortittunut ikinnerusukkuutaarlutik agguarsimallutik. Tamannalu qanoq ilinniarfigineqarsinnaava?
Ilanngussat: „8. apriili 2008 kommuninut qinersinissami inernerit qanoq naatsorsorneqassappat?" Kujataata kommunianut, Kangia/Kitaata kommunianut, Qeqqata kommunianut aamma Avannaata kommunianut tunngatillugit.
(Qulaaniittut aamma "Aaqqissuussaaneq - Strukturnyt " nr. 15-imi saqqummiunneqarput.)
