Ukioq nutaaq iserfigisarput tassaassaaq pisortat suliassaqarfiisa aaqqissuussaanerannik iluarsaaqqinnissamut iserfissaq siulleq, tassa apriilip ulluisa arfineq-pingajuanni ikaarsaariarnermut ataatsimiititalianut aappaagu januaarip aallaqqaataaniit kommunini nutaani kommunalbestyrelsinngortussanut qinersisoqartussaammat.
Taamaattumik matumuuna innuttaasut kajumissaarusuppakka tamatumani soqutiginnilluarlutik akuunissaannut – tassami kommunit kattunnissaat aatsaat 2009-p aallartinnerani pisussaagaluartoq kommunerujussuanngortussani politikkikkut oqartussaasussat upernaaru qinerneqareertussaammata.
Aammami tulluartuussaaq maanna ukiut nikinneranni tamatta eqqarsaatigisassatsitut ima aperissalluta: Aaqqissuussinissaq nutaaq upernaaru qinersinissakkut appakaaffiginialigassarput qanoq sunullu atorumassavarput?
Kommuneqarfiit kattuffiat isumaqarpoq inuiaqatigiit aaqqissuussaaneranni sinaakkutit atuutilersussat nutaat minnerunngitsumik isumaginninnikkut nukittorsaanissamut atorneqartariaqartut. Ilaqutariinnik nukittorsaanissaq kommunerujussuanngortussani kivitseqatigiissutigineqartariaqarpoq.
Inuiaqatigiit patajaatsumik ingerlassappata ”ilaqutariit nukittuut” pisariaqarnerat KANUKOKA-p tungaanit siusinnerusukkulli tikkuarneqartarsimavoq. Tassani eqqarsaatigineqanngillat ilaqutariit ajornartorsiutissaqanngitsut – taamaattunimmi inoqanngilaq – pineqarlutilli ilaqutariit ajornartorsiutinik akiuisinnaasut pinaveersaartitsisinnaasullu, meerartatik atuarfimmi ingerlalluarneruniassammata ulluinnarnilu ajornartorsiutaasartunut illersuutissaqarniassammata.
Taamaattumik ilaqutariinnut siunnersuisarfeqalernissamik suliniutit pitsaasut misilittagaqarfigilluarneqalereersullu tamaasa kommunit Namminersornerullutillu Oqartussat akornanni ataqatigiissarneqartariaqarput siuarsarneqarlutillu ilaqutariikkuutaanik katsorsaaneq annertusarneqaqqullugu.
Tamanna ilumut apriilimi qinersinissap tungaanut oqallittarnissani eqeersimaartumik ingerlanneqarnissaannik neriuuteqarfigisatsinni oqallisigisassaqqissunut ilaavoq.
Ukiortaami pilluaritsi!
KANUKOKA-p siulersuisui sinnerlugit
Søren Alaufesen
siulittaasoq
