Novembarip pingajuani 2008 Naalakkersuisunut Inatsisartunullu allagaqarluni Enok Sandgreenip oqaatigaa sipaarniarnerup meeqqat atuarfiannut attuumassutillit assigiinngitsut eqqortussanngorai. "Sulisut, ilinniartitsisut pisortallu pikkorissarnissaat ikigisassaanngitsut inunnut meeqqat atuarfiannut attuumassutilinnut 100-nik arlalinnik amerlassusilinnut ukiuni tulliuttuni pikkorissanngitsoornermik kinguneqartussat KANUKOKA-mit ilioriarnerliornertut isigaavut," Enok Sandgreen allappoq.

Allakkami allami 7. novembari 2008 ullulikkami Enok Sandgreenip inissialiortiternerup sipaarniarfigineqarnissaa mianersoqqussutigaa.

"Sipaarutissatut siunnersuutit taakku ima isumaqartippakka tassa Naalakkersuisut illoqarfinni annerusuni illuliortiterneq aningaasartaqartinnagu kommuninut tunniunnialeraat," Enok Sandgreen taama oqaaseqarpoq.

Kangia/Kitaani kommunit Ikaarsaariarnermi ataatsimiititaliaannut siulittaasup Asii Chemnitz Narupip aningaasanut inatsisissatut siunnersuut ernumaammissutigeqalugu atuarsimanerarpaa. Tassami kontut ataasiakkaat misissuataaraanni paasinarpoq sipaarutissatut siunnersuutit 75 procentiisa missingisa Kommuneqarfik Sermersooq eqqortussaagaat. Assersuutigalugu inissialiortiternerup tungaatigut illoqarfiit pingaarnersaattut aaqqiineq peerneqarluinnarsimavoq kiisalu 20/20/60 atorlugu sanaartornermut aningaasaliissutit minnerpaaffissaannut ilineqarsimallutik.

Hermann Berthelsen, Qeqqata kommuneriligassaani Ikaarsaariarnermi ataatsimiititaliamut siulittaasoq, aperivoq Naalakkersuisut ukiuni aggersuni inissialiortiternerup qanoq aningaasalersorneqarnissaanik qanoq isumaliornersut. Paasersuppaattaaq Naalakkersuisut namminneerlutik inissialiornianut 20/20/60 aqqutigalugu attartornianut itigartitsisarnissaq naatsorsuutigineraat, Qeqqata Kommuniani paasissutissat pigineqartut tunngavigalugit siusinnerusukkut taamaattoqarsimanngimmat.

Allakkat matuma ataani aaneqarsinnaapput.