Ukiup ataatsip matuma siornatigut borgmesterit kommuninilu atorfillit qullersaasa Nuummi ataatsimiinnerminni ajuusaarutigalugu uparuarpaat Inatsisartut Aaqqissuusseqqinnissaq pillugu Ataatsimiititaliarigallagaata siunnersuisoqatigiinnik taamaattunik pilersitsisinnaanissamik eqqarsaat akuersaanngimmagu. Tassami sumiiffinni siunnersuisoqatigeeqarnissamik eqqarsaat iluatinnartipparput kommunerujussuanngortussani kommunalbestyrelsit ataanni qanimut oqartussaaqataanikkut periarfissatigut nutaaliorluni ineriartortitsiviusinnaasutut isigigatsigu.

 

Nuannerpoq nunaqarfinni aqutsisut iluarsaqqinneqaraluarlutik ikilineqartussaagaluarlutillu atatiinnarneqarniarmata, taamaalillunilu kommunit aaqqissuussaaneranni nutaami nunaqarfinni oqartussaaqataaneq qulakkeerneqassammat.

 

Taamaattumik imminut akerlilertutullusooq iliornerussaaq sumiiffinni siunnersuisoqatigeeqarnermik eqqarsaatip itigartinneratigut innuttaasut amerlanersaasa illoqarfinni najugaqartut qanimut oqartussaaqataanerup tungaatigut taamatuttaaq periarfissinngitsuussagaanni. Tassami nunaqarfinni aqutsisoqarnerup isumaa ajunngitsoq sumiiffinni siunnersuisoqatigeeqarnikkut aammattaaq illoqarfinni atorneqarsinnaalissagaluarpoq nuannaarutaalluni iluaqutaallunilu.

 

Taamaalilluta kaammattuutigerusupparput sumiiffinni siunnersuisoqatigeeqarnermik eqqarsaat Inatsisartuni iluamik periarfissinneqassasoq.

 

Inussiarnersumik

 

 

Enok Sandgreen

KANUKOKA-p siulittaasua

  

Sumiiffinni siunnersuisoqatigeeqalersinnaaneq aamma ”Aaqqissuussaaneq 12”-imi isummersorfigineqarpoq: http://www.kanukoka.gl/media/1053_2899.pdf