Tassami innuttaasunik kiffartuussinerup nutarterneqarnissaata piareersarneqaleruttornerani kommuninut ataatsimoortumik tapiissutit ukiumut 36 mio. kr.-inik sipaarniarfigineqarniarnerat akornutaalersussaavoq. Aammalu nunaqarfinni sanaartugassat illuliortiternerullu ukiumut 45 mio. kr.-inik annikillilerniarneqarnerat, tamatumalu peqatigisaanik inissialiortiternerup sumiiffimmut aalajangersimasumut eqiterlugu sumiiffinni allani sanaartornerup unikaallarujussuartinniarneqarnera, aaqqissuussaanermik iluarsaaqqinnerup siunertaasa pingaarnerit ilaannut akerliuniarnertut misigeqqajaanarpoq, tassa siunertaagaluarmat nunap immikkoortuini ataasiakkaani atugassarititaasunik nalimmassaanissaq.
Aaqqissuussaanermik iluarsaaqqinnermi annertoqisumi, kommunit kattunnerannik ilaqartumi, siunertat pingaarnersarigaluarpaat innuttaasunik sullissinerup pitsaanerulernissaa atugassarititaasullu naligiissarneqarnissaat.
Borgmesterit sisamaasut aamma Kalaallit Nunaanni Kommunit Kattuffianni siulersuisut aningaasanut inatsisissatut siunnersuut oqaluusereqqammerpaat. Tamatumunnga atatillugu Aaqqissuussaanermut Isumalioqatigiissitat missiliuussinerat kommuninit maluginiarneqarpoq, tassa aaqqissuussaanermik iluarsaaqqinnerup aningaasatigut iluanaarutissartai imaaliallaannaq malunniunnavianngitsut, kisiannili allaffissornermut aningaasartuutit aaqqissuusseqqinnerup ukiuini siullerni allaat qaffakkallarumaartut – tamannalumi kommunit ullumikkut malugisimavaat. Aamma suliassaqarfinnik Namminersorlutik Oqartussanit kommuninut nussuinissaq ullormi ataatsimi pinavianngilaq, kisiannili 2013-ip tungaanut ingerlanneqassalluni suliassaqarfiit aningaasartaat isumaqatigiissutigineqaraangata. Tamanna politikerit qitiusumik oqartussaasut kommunillu akornanni maannamut akerleriissutaanngikkaluarpoq.
Aammami suliassaqarfiit nuunneqartussatut taagorneqartut siulliit qulaajarneqarnerat suliluunniit naammassineqanngilaq. Puigortariaqanngilarlu kommunit ilinniartitaanikkut immikkut ittumik siuarsaanissamut maannamut 80 mio. kr.-inik akiliuteqarsimammata ataatsimoortumik tapiissutini sipaarutitut akiliutigineqarsimasunik.
Taamaattumik KANUKOKA borgmesterillu isumaqarput Naalakkersuisut kommunini sulisunik 75-inik naleqartussanik manna sipaaruteqarnialernerat eqqarsaatigilluagaarpasinngitsoq. Tamanna aaqqissuussaanermik iluarsaaqqinnerup siunertaanik, ilusaanik qanorlu tulleriiaakkamik naammassineqanissaanik eqqarsaataareersunut ataqatigiissunut naleqqutinngilaq.
Naalakkersuisut silatusaassapput aningaasanut inatsisissamik allamik iluarsaaqqinnermut annertoqisumut Namminersorlutik Oqartussat kommunillu tamarmik akuuffigisaannut ajoqusiisussaanngitsumik saqqummiussigunik.
Inussiarnersumik
borgmesterit sisamat KANUKOKA-llu siulersuisui sinnerlugit
