Siullermik pilluaqqorusuppakkit Nunami namminermi pissutsinut naalakkersuisunngorninni, qutsavigalutillu kommunit politikkikkut siulersugaaneranni peqataasimaninnut. Neriuutigaara kommuninut tunngasut oqartussaaffigalugit naalakkersuisunngorninni siunissami suleqatigilluarumaaritsigit sulininnilu kommunit soqutigisaat puigussanngikkitit!
Naalakkersuisunngorninnut atatillugu oqaaseqarninni kommunit suliassaqarfinnik tigusinissaat pillugu oqaaserisatit maluginiarpakka – erseqqissaateqartariaqartutullu misigivunga.
Naluneqanngilaq pisortat suliassaqarfiisa aaqqissuussaanerannik iluarsaaqqinnermut kommunillu kattunnerannut atatillugu Namminersornerullutik Oqartussat suliassaqarfiinik tigusinissaq kommuninit pingaartinneqartorujussuusoq, allaat kommunit iluarsaaqqinnermut peqataarusunnerannut tunngaviusut pingaarnerpaat ilaattut isigineqarluni. Naalakkersuisunngorninnili oqaatigivat tigooraaniarnermi tamatumani ”kommunit kinguartooqqasorujussuusut.”
Tunuliaqutaasut ilisimalluanngikkaanni tamanna paatsuunganarsinnaammat imaattumik erseqqissaateqarusuppunga:
Kommunit 1. januaari 2009-mi kattunnerisa kingorna suliassaqarfinnik sapinngisamik piaartumik tigusinissaq kommuninit soqutigineqartuarsimavoq, aammali erseqqissarneqartuarsimavoq suliassaqarfiit aningaasartaat malinnaasariaqartut – illillu kommunininngaanniit tamatuminnga piumasaqartunut nippaarinnernut ilaasimavutit. Aamma inatsisiliornikkut aaqqitassat soorunami isumannaarneqaqqaartariaqarnerat kommuninit pingaartinneqartuarsimavoq.
Taamaattumik suliassaqarfinnik kommuninut nuussinnerup siulliup 1. januaari 2009-mi pinnani 1. januaari 2010-mi pinissaa siunniunneqarsimavoq. Tamanna piareersarluakkamik pisinnaaqqullugu suleqatigiissitat arlallit atorfilinnik kommunineersunik aamma Namminersornerullutik Oqartussaneersunik inuttaqartut piareersaatinneqarput.
Taavali Inatsisartunut qinersisoqartussanngorpoq. Arlaleriarlutalu Namminersornerullutik Oqartussanut paasiniaasareerluta atorfilitsigut ilisimatinneqarpugut pisariaqartutigut inatsisinik allanngortitsinissat, sulisunik siumoortumik ilisimatitsinissat il.il. eqqarsaatigalugit 2010-mi januaarip aallaqqaataani kommuninut nuussinissaq suliassaqarfiit ilaat eqqarsaatigalugit pisinnaajunnaartoq.
Pissutsit tamakku KANUKOKA-mut aallartitat maajip naalernerani ataatsimiinnerannut siulersuisut nalunaarutaanni nassuiaatigineqarput.
Isumaqarpunga pissutsit qanoq ittuunerannik eqqortumik paasinninnissamut tamakku oqaatigissallugit pisariaqartut – tassa kommunit ”kinguartooqqasorujussuunngimmata”, tassami suliassaqarfinnik tigooraanerup qanoq sukkatigisumik pinissaanut aningaasatigut inatsisiliornikkullu tunngavissat Namminersornerullutik Oqartussat maanna oqartussaaffigisaat apeqqutaasorujussuummata.
Suleqatigiilluarnissamik neriullunga inuulluaqqusivunga
Enok Sandgreen
KANUKOKA-p siulittaasua
