Kommunit isumaginninnermi atuarfeqarnermilu ataatsimiititaliaasa siulittaasuisa ingerlatsivinnilu pisortaatitaasa ilaqutariit meerartallit ikiorserneqartarnerat pillugu isumasioqatigiinneranni siunissaq qaninnerusoq ungasinnerusorlu eqqarsaatigalugit iliuusissat pingaartitassallu arlallit tikkuartor­ne­qar­­put.

 

Meeqqanik isumaginninnermi ajornartorsiutit ilisimaarineqalereersut, aamma meeqqat atugarisaat pillugit nalunaarusiami nutaami uppernarsarneqartut, ilungersunartutut isigineqarput. Isumaqatigiissuti­gineqarporlu ajornartorsiutit sukumiisumik sunniuteqarluartumillu akiorneqassappata immikkoor­tut pingasut pitsanngorsaavigineqarnissaat pisariaqarluinnassasoq:

 

Isumaginnittoqarfiit, atuarfiit meeqqeriviillu pisussaaffiliisumik suleqatigiilernissaat: Suleqatigiinneq tamanna pisariaqarpoq meeqqat angajoqqaallu isumannartut eqqumaffigineqassappata pi­aartumillu ikiorserneqarsinnaasassappata.

 

Piaarnerpaamik suliniutissat: Sumiiffinni tamani isumaginnittoqarfiit, angajoqqaat, atuarfiit, meeqqeriviit, peqqinnissaqarfiit allallu susassaqartut meeqqat inuusuttuaqqal­lu immikkut isumassorneqartariaqartut pillugit suleqatigiittarnissamik isumaqatigiissu­siortariaqarput. Meeqqat inersimasullu meeqqat pisinnaatitaaffiinik qaammarsarneqartuarnissaat qulakkeerneqartariaqarpoq.

 

Siunissaq ungasinnerusoq eqqarsaatigalugu: Inuiaqatigiinni susassareqatigiinnitsin­nik akisussaaqatigiinnitsinnillu angajoqqaat peqatigalugit qaammarsaanissarput pingaartilluinnartariaqarparput.

 

Ilaqutariinnik nukittorsaaneq: Maluginiarneqarsimavoq meeqqanik kaatsitsisoqartarnera tassatuaanngitsoq pissaaleqisut ajornartorsiutaat, aammali ilaqutariinni akissaqarnerusuni atuuttoq. Taa­maat­tumik sumiiffinni politikerit siuttuusariaqarput ilaqutariinni pingaartitassat angajoqqaatullu aki­­sussaaffiup innuttaasunut oqallisigitinneqarnissaannut isummerfigitinneqarnissaannullu. Aamma ilaqutariinnut siunnersuisarfinnik, familiecenterinik, piorsaanissaq pisariaqarluinnarpoq.

 

Piaarnerpaamik suliniutissaq: Ilaqutariinnut Sullissivinnut (familiecenterinut) qitiusumit tapiissuteqartarnerup isumannaannerusumik aaqqinneqarnissaa pisariaqarpoq – sulisoqarneq kisiat eqqarsaatiginagu, aammali sullissiviit illutassaqarnissaat eqqarsaatigalugu.

 

Siunissaq ungasinnerusoq eqqarsaatigalugu: Angajoqqaat perorsaanerminni najoqqutassaannik suliaqarnissaq.

 

Suleriaatsinik eqaallisaaneq: Inatsisit ilaqutariinnik ikiorsiisarnermut meeqqanillu isumaginninnermut tunngasut nunatsinnut tulluarsagaasariaqarput, pisariitsuliaassallutik paasiuminartuliaassallutillu, allaffissornikkut pisinnaasat sipporlugit piumasaqaatitaqaratik. Nukiit piffissarlu annertuallaarujussuartut ullumikkut allaffissornermut atorneqartarput – sullissisut ikiortarialinnut piffissaqarnerorusupput.

 

Piaarnerpaamik suliniutissaq: Inatsisartut ikiorsiisarnermik peqqussut nalunaarullu iluarsisariaqarpaat akunnattumik isertitaqartut meerallit pinasuartumik ikiorserneqarsin­naasannginnerat qaangerniarlugu.

 

Siunissaq ungasinnerusoq eqqarsaatigalugu: Nukiit ilaqutariinnik sullissinermut atorneqartut Ilaqutariinnut Sullissivinnut nuunneqassapput. Kommunit ataatsimoo­russamik ingerlatsiviannik pilersitsisoqarpat annertuunik pinartunillu pisoqartillugu ornigullutik ikiuiartorasuartartunik pilersitsisoqartariaqarpoq. 

 

Qulaani taaneqartut saniatigut isumasioqatigiit makku aaqqinneqaqquaat:

 

• Meeqqanut tapit qaffanneqartariaqarput – tamannali naammannavianngilaq nioqqutissat akii peqqinnartunik nerisaqarnissamut kajumissaataanngitsut qitiusumit iluarsiivigine­qanngip­pa­ta.
  
• Ilinniartitaanermi immikkut iliuusissanut aningaasaliissutitigut maannamut peqqinnissaqar­fiup annertunerusumik aningaasaliiffigineqartarsimanera maluginiarneqarpoq - isumaginninnermi sulisut ilinniartitaanerisa aningaasaliiffigineqarnerunissaat pisariaqarluinnartoq naalakkersuisunut tusartikkusunneqarpoq.
   
• Isumaginninnermi sulisut ilinniartitaalluarnissaat pisariaqarpoq, aamma sulisussat piukkun­nartut pioreersut atorluarneqarnissaat siunertaralugu.
  
• Namminersornerullutik Oqartussat pikkorissartitsinikkut suliniutaat kommunit qanimut suleqatigalugit ingerlanneqartariaqarput.
  
• Sakkortuumik uparuartariaqartinneqarpoq angajoqqaat meeqqerivinnut akiliutissaasa aalaja­nger­sar­neqarnerannut atuartitaanermut naalakkersuisoqarfimmit erseqqissunik ilitsersuu­teqan­nginnera, taamalu kommunit kattunneranni tamakkuninnga aalajangersaanialernermi annertuutigut nalornisoortoqartarsi­manera.
  
• Atuartunik nerisaqartitsinermut periarfissat pilersaarutillu atuartitaanermut naalakkersuisup nassuiaateqarfigimmagit maluginiarnarpoq 2009-mut 5,9 mio kr.-it tama­tumunnga Nammi­nersornerullutik Oqartussanit aningaasaliissutaanerat. Nunali tamakker­lugu pisariaqartit­sineq matussusissagaanni amerlanerujussuit pisariaqartinne­qassapput.
  
• Nerisaqartitsinermut qitiusumit piumasaqaatit sakkortuallaarput. Naalakkersuisup kommunit peqa­taaf­figi­sassaannik suleqatigiissitaliornissamik siunnersuutaa ilassilluarneqarpoq.
  
• Kommunini suliniuterpassuit meeqqanut ilaqutariinnullu sammisitat ingerlanneqarput, ta­mak­kulu puigorneqassanngillat sapinngisamillu kommuninit iluaqutiginiarneqarlutik ine­riartortinne­qarlutillu atorneqassallutik. 

Isumasioqatigiit isumaqarput naalakkersuinikkut siunissaq ungasinnerusoq eqqarsaatigalugu ili­uu­sissatut pilersaarutit Kalaallit Nunaanni meeqqat inuuniarnermikkut atugarisaannik ilisima­sa­nik uppernarsarneqareersunik aallaaveqas­sasut.

Isumasioqatigiit sinnerlugit
Inussiarnersumi
Enok Sandgreen
KANUKOKA-p siulittaasua

Una tooruk isumasioqatigiinnermik eqikkaaneq ilanngussallu takujumallugit