Isumasioqatigiinnissaq pissaaq Ilulissani Hotel Arctic-imi sisamanngorneq 26. februaarimiit sapaat 1. marsi 2009 ilanngullugu.
Isumasioqatigiinnermi peqataasussat siullermik tassaapput kommunini sisamaasuni isumaginninnermi atuarfeqarnermilu ataatsimiititaliani siulittaasut ingerlatsivinnilu pisortat. Aamma Naalakkersuisunut ilaasortat suliassaqarfinnut taakkununnga tunngatillugu susassaqartut peqataassamaarput.
Isumasioqatigiinnissaq KANUKOKA-p siulersuisuisa (aamma borgmesterit sisamaasut peqataaffigisaasa) ukioq manna siullermik ataatsimiinnerminni aalajangiussaannik malittarinninnerussaaq, tassa aalajangiukkamikku ilaqutariinnut meerartalinnut tunngatillugu aaqqissuussinerit misissorluarneqassasut. Tamanna pivoq meeqqat kaattut tusagaaqqilernerata kingorna.
Isumasioqatigiinnermi Inatsisartut peqqussutaat marluk sammineqassapput, tassa pisortanit ikiorsiisarnermut aammalu meeqqanik inuusuttunillu ikiorsiisarnermut peqqussutit.
Paasisariaqarparput inatsisit tamakku pitsaasumik siunertaattut atorneqarnersut – aammalu pinasuartumik ikiorsiinissamut sunik aporfissaqartitsinersut.
Ulluinnarni sullissisut ilaqutariinnut meerartalinnut siunnersuisarnerat pitsaanerusinnaava? Aamma pisortanit ikiorsiissutit ataanni meeqqamut ataatsimut tapiissutaasartoq qaffattariaqarpa? Apeqqutit soorlu taamaattut akissutissarsinerisigut kommunini ataatsimiititaliat kommunalbestyrelsillu ajornartorsiutit aalajangersimasut pillugit suleriaasii nukittorsarlugillu pitsaanerulersinniarneqassapput, tamatumalu peqatigisaanik Namminersornerullutik Oqartussat paasitinneqassallutik inatsisiliornikkut aningaasaliisarnikkullu qitiusumit qanoq iliuuseqartariaqarnerannik.
Kalaallit Nunaanni Kommunit Kattuffiat kommunini tamalaani misilittakkat paasisallu tunngavigalugit ukiuni kingullerni kajumissaarisarpoq ilaqutariit nukittorsarneqarnissaannik suliniutit sakkortusarneqaqqullugit. Tamanna qanoq pingaaruteqartigisoq nalunaarusiatigut uppernarsarneqarpoq. Kattuffiullu kissaatigaa isumasioqatigiinnissap kingunerisaanik suliassaqarfimmi tamatumani sulineq malunnaatilimmik pitsanngorsarneqassasoq.
Inussiarnersumik
Enok Sandgreen
siulittaasoq
