Aningaasaqarnermut Naalakkersuisoq Palle Christiansen 2010-mut Inatsisartut aningaasanut inatsisissaata Inatsisartunut saqqummiunnerani oqarpoq kommunit sipaarutissanik ujarlerlutik aallatereernerarlugit. Naalakkersuisunut ilaasortap oqaaseqarnermini nipeqalersippaa soorlu kommunit akuersereersut aappaagumut ataatsimoortumik tapiissutitsigut 36 mio. kr.-inik sipaarniarfigineqarniarnerminnut.
Erseqqissartariaqarpara kommunit ukioq manna aningaasartuutissaminnit sipaarniuteqarneq ingerlattariaqalersimammassuk, tassa ingerlatsinermi sipaarniuteqarlutik. Taamatut pisariaqalernermi pissutaasut ilagaat innuttaasunut sullissinermi kommunitoqqat sullissineranni aningaasartuutit sinnerlugit maanna inuuttaasunik sullisinermi aningaasartuutaasut nalimmassaavigisariaqalermata. Taamatut nalimmassaasariaqarneq aningaasarpassuarnik akeqartoq, kommunit namminneq akilertariaqalerpaat, Namminersorlutik Oqartussaniit tapiiffigineqaqqinnatik nalimmassaaneq ingerlakkamikku.
Taamaattumik kommunit akileraartarnermi isertitamikkut qaffasinnerumik isertitaqartarnerat tikkuartorlugu sipaarsinnaalluartumik eqqartorneqarnerat eqqunngilaq.
Erseqqissartariaqarparalu Naalakkersuisuni ilaasortap ataatsimeeqatiginerani erseqqissaaffigereeratsigu ataatsimoortumik tapiissutitsigut ilanngaaniarnermik pilersaarutit kommunit nammassinngaanngikkaat.
Kommunit sipaarfiginiarneqarnerannut tunngatillugu naalakkersuisuniit tikkuartorneqarpoq kommunit akileraarutitsigut isertitamikkut qaffariartorfiusumik ingerlasut. Uangali borgmesterillu ataatsimeeqatigigatsigu Akileraartarnermi aqutsisoqarfimmi pisortap saqqummiuppaa pissutsit killormut ingerlasut. Tassa 2008-mi naatsorsuutit naammassineranni kommunini tigusassat appariarsimasut aammalu 2009-mi appariartornerat ataannassasoq naatsorsuutigisariaqartoq.
Taamaattumik Inatsisartuni ilaasortat erseqqissaavigisariaqarsoraakka iluarsaaqqinneq nutaaq nakkaaneqarsinnaammat, aammalu innuttaasunik sullissineq allaat kinguariartorujussuusinnaalluni Inatsisartut kommuninut tapiissutitsigut Naalakkersuisut sipaarniarnerat akuerissaasappassuk.
Inussiarnersumik
Enok Sandgreen
Siulittaasoq
