Ukioq nutaaq kommunit aaqqissuussaaneranni pissutsinut nutaanut iserfiusussaq suleqatigiinnissamik ataqqeqatigiinnissamillu immikkut pisariaqartitsiffiusussaavoq. Eqqaamassavarpummi innuttaasut kiffartuunneqarnerata pitsanngorsarneqarnissaa pisariillisarneqarnissaalu aaqqissuussaanermik iluarsaaqqinnermi kommunit kattussorfigisaanni siunertat pingaarnersarimmassuk. Siunertarlu taanna naapertorlugu suliassavut pisinnaasavut malillugit ingerlatissavavut angippata mikippataluunniit.
Kommunit 18-iusimasut sisamanngorlutik kattunnerat aaqqissuussaanermillu iluarsaaqqinneq tassaniittoq iliuusiuvoq imaannaanngitsoq nunagisatsinni angisuumi siamasissunik inoqarfilimmi.
Taamaattumik piareersarnermut nukippassuit atorneqareersimagaluartut suut tamavimmik ullormi siullermi aaqqereersimanissaat naatsorsuutigissallugu piviusorsiornerussanngilaq. Ajornartorsiutaasinnaasulli aaqqitassallu oqaloqatigiissinnaaneq attaveqaqatigiinnissamullu periarfissat atorluarlugit suleqatigiinnikkut paaseqatigiinniarnikkullu soorunami piaartumik iluarsineqartarumaarput.
Aammami aaqqissuussaanermik iluarsaaqqinneq tamavimmi ullormi ataatsimi pisussaanngilaq. Maannali ukiut nikinneranni inuiaqatigiit kiffartuunneqarneranni ineriartortinneqarnerannilu periarfissanik nutaanik ammaassisumik inatsisitigut tunngavissaqalerpugut – qilanaarpugullu periarfissat tamakkua iluaqutiginialernissaannut. Naammassisaqarfiusumik suleqatigiinnerunissap kommunit 18-iusut atuunneranni ataasiarani oqaluuserineqartarsimasup timitalerneqannginnissaanut maanna patsisissaaruppoq.
Kommunit kattuffitsik suleqatigalugu aaqqissuussinermi nutaami nukittuumik ataasiusumillu aallartinnissaata kissaatigineqarnera ersersinneqarpoq borgmesteriulersussat sisamaasut kattuffiup siulersorneqarnerani aalajangersimasumik peqataalernissaat ukiarmi aallartitat ataatsimiinneranni aalajangerneqarmat. Taamatut aaqqiineq nukittoqutitut isumalluarnartutut misigilereerparput.
Kommunalbestyrelsitoqqat atuukkunnaartut kommuninilu sulisorpassuit suliami pingaartumi innuttaasunik kiffartuussinermi maannamut naammassisaannik qutsavigingaarpavut. Kommunalbestyrelsillu nutaat aallartilluaqquavut sulisutik peqatigalugit siunertami pingaartumi siulersortaalluarnissaannik kissaallugit. Aamma nunaqqativut tamaasa ukiumik nutaamik pilluarnartumik kissaappavut.
Inussiarnersumik
