Siullermik: Meeraq ullumi nerisariaqarpoq. Aqagumut utaqqisinneqarsinnaasut allat aqagumut utaq­qisinneqassapput.

 

Pingaarnersiuinermi tunngaviit peqqinnartut taamaattut suni tamani atorneqarlit – aalajangiisartuni, isumaginnittoqarfinni ilaqutariinnilu.

 

Aappassaanik erseqqissarusupparput meeqqat, inuusuttut ilaqutariillu pillugit suliniutit arlalissuit kommuninit aammalu Ilaqutariinnut Peqqissutsimullu Naalakkersuisoqarfimmit aallartinneqa­reer­mata aammalu isumaginninnermi Inatsisartut inatsiseqarmata kom­munit malitassaannik unioqqutissinnaanngisaannillu.

 

Inatsisitigut tunngavissat sinaakkutissallu atuutereersut periarfissarititaasa sapinngisamik eqaan­ner­paamik periataarsinnassuseqarluartumillu maanna qanoq atorneqarsinnaanerat eqqumaffigeqqissaar­neqartariaqarpoq.

 

Suliniutit tunngavissallu maanna atuuttut naammannersut pissusissaattullu atorne­qarnersut nalilersorneqassapput. Taamalu KANUKOKA-p siulersuisuisa pilersaarutigaat kommunini nutaani sisamani isumaginninnermi atuarfeqarnermilu ataatsimiititaliani siulittaasut ingerlatsivinnilu pisortat katersuutsin­neqassa­sut, suliniutit aallartinneqareersimasut politikkikkullu siunertaasut kommunini nutaani qanoq atorluarneqarnerunissaat qanorlu ineriartortinneqarnissaat isumasioqatigiissutigalugit.

 

Tamatuma saniatigut kommunit kissaateqarnerat naapertorlugu Naalakkersuisut aamma KANUKOKA sapaatip-akunnerata uuma ingerlanerani isumaginninnermi aalajangersakkat aningaa­sartaasa ullutsinnut naleqqussarneqarnissaat siunertaralugu ataatsimeeqatigiissapput. Tamatumani ilanngullugu atuarfinni tamani meeqqat nerisaqartinneqartarnerata atulersinneqarnissaa oqaluuserineqassaaq.

 

Peqatigisaanik Naalakkersuisut siulittaasuata Hans Enoksenip kattuffinnik suliniaqatigiiffinnillu meeqqat inuusuttullu pillugit sullissinermik attuumassuteqartunik tulleriiaaraluni ataatsimeeqateqartarnini ingerlatiinnassavai, meeqqat kaattut pillugit ikiuinissami ilisimasaqartut ataatsimut suliniar­nermi suleqataallutik peqataanissaat siunertaralugu.

 

 

Inuulluaqqusilluta

 

 

Enok Sandgreen	Simon Simonsen	Asii Chemnitz Narup
Hermann Berthelsen	Jess Svane	Hans Enoksen