Nunamut namminermut, Pinngortitamut Avatangiisinullu naalakkersuisoq Anthon Frederiksen ilumoorluinnarpoq septembarip 14-iani Qanoruumi oqarami kommunit kattuffitsik peqatigalugu aaqqissuussaanermik iluarsaaqqinnermut ”Pisortat suliassaqarfiinik aaqqissuusseqqinnissaq pillugu isumaliutissiissut”-ikkut 2005-ip naalernerani oqaasertaliorneqartumut tapersersuillutillu suleqataasimasut.
Putusaarivorli aallakaatitami tassani maanna kommuniusut isumaliutissiissummik atuarsimanngitsutut iluarsaaqqinnerullu kingunerisassaanut piareersarluanngitsutut oqaatiginiarsarigamigit.
Naalakkersuisut kommuninut ataatsimoortumik tapiissutinik ikilileriniarnerat kommunit sapaatip-akunnerani qaangiuttumi sakkortuumik uparuaramikku taamaalillutik naalakkersuisunut ilaasortamit naveerneqarput. Borgmesterit KANUKOKA-llu uparuagaat tassaasimavoq aningaasanut inatsisissami ukiumut 36 mio. kr.-inik sipaaruteqarniarnerup eqqarsaatigilluagaarpasinnginnera aammalu aaqqissuussaanermik iluarsaaqqinnerup siunertaanik, ilusaanik qanorlu tulleriiaakkamik naammassineqarnissaanik eqqarsaatinut isumaqatigiissutaareersunut naapertuutinnginnera.
Aamma quianaannarporluunniit Anthon Frederiksenip nalusuusaarmagu sooq Namminersorlutik Oqartussat maanna suliassaqarfiisa ilaat 2009-mi januaarip aallaqqaataani kommuninut nutaanut tunniunneqarsimannginnersut (aaqqissuussaanermik iluarsaaqqinnerup siunertaasa ilagilluinnarpaat suliassaqarfinnik kommuninut nuussinissaq). Tassami naalakkersuisunut ilaasortaq nammineq 2008-p naanissaata tungaanut borgmesteriugallarami suliassaqarfinnik kommuninut nuussinissap piareersarluagaanissaanik suliassaqarfiillu aningaasartaasa isumaqatigiinniarnikkut isumannaarneqaqqaarnissaannik noqqaassuteqartunut pingaarnernut ilaasimavoq.
Borgmesterit sapaatip-akunnerani tulliuttumi Naalakkersuisunik ataatsimeeqateqarnissaminnut qilanaarput. Neriuppugut Anthon Frederiksen aamma ataatsimeeqataajumaartoq, taamaalilluni attaveqaqatigiinneq tusagassiuutitigut oqaaseqaqattaarnikkuinnaq pinnginniassammat. Nunatsinni politikkikkut oqartussaasut nutaat aningaasaqarnikkut pissutsit pillugit kommunerujussuarni nutaani atugassarititaasunut piviusunut sanilliussilluni oqaloqatiginissaat qilanaarivarput.
Inussiarnersumik
borgmesterit uku sinnerlugit: Simon Simonsen (Kommune Kujalleq), Asii Chemnitz Narup (Kommuneqarfik Sermersooq), Hermann Berthelsen (Qeqqata Kommunia) aamma Jess Svane (Qaasuitsup Kommunia)
Enok Sandgreen
KANUKOKA-p siulittaasua
Una tooruk sammisaq taanna pillugu siusinnerusukkut tusagassiorfinnut nalunaarut atuarumallugu
