15. juuni 2010: Aaqqissuussaanermut isumaliutissiissut Naalakkersuisullu kommunit Pillugit nassuiaataat kommunillu aallartitaasa Ilulissani ataatsimiinneranni oqallinnerit tunngavigalugit maajip 20-ani 2010 Naalakkersuisut, borgmesterit aamma KANUKOKA'p siulersuisui isumaqatigiissuteqarput Namminersorlutik Oqartussanit kommuninut suliassanik nussuinissami pisortallu suliassaqarfiisa aaqqissugaanerannik ingerlaqqinnissami politikkikkut ataqatigiissaarisussanik pilersitsiniarlutik.

Politikkikkut ataqatigiissaarisussanut ilaasortaapput Naalakkersuisut siulittaasuat Kuupik Kleist ataqatigiissaarisut siulittaasuattut, Nunamut namminermut Naalakkersuisoq Anthon Frederiksen, Qeqqata Kommuniani borgmesteri Hermann Berthelsen aamma KANUKOKA-mi siulittaasoq Enok Sandgreen.

KANUKOKA-p siulittaasua Enok Sandgreen aamma naalakkersuisut siulittaasuat Kuupik Kleist aaqqissuussaanermik iluarsaaqqinnerup ingerlaqqinnissaanik isumaqatigiissuteqarput.

Ullumikkut juunip 15-ini 2010 ataqatigiissaarisutut suliaqartussat siullermeerlutik ataatsimiipput tassanilu aaqqiissuusseqqinnerup aammalu suliassanik nussuinissap ingerlateqqinnissaanut isumaqatigiissut atsioqatigiissutigineqarpoq. Taassuma saniatigut ataatsimoorullugu allaffissornikkut ataqatigiissaarisussanik pilersitsisoqarpoq taakkualu Namminersorlutik Oqartusanit Kommuninut suliassanik nussuinissaq allaffissornikkut piareersassavaat.

Politikkikkut ataqatigiissaarisut aaqqissuusseqqinneq aammalu kommuninut suliassanik nussuinissaq pingaartippaat tassani tatigeqatigiilluni, ingerlaavartumillu ataqatigiissumillu sulinissaq pingaartinneqarluni.

Ataqatigiissarisut nuannaarutigaat suliap aallartinneqarnera aamma sulissutiginiarpaat suliassaqarfiit suliarineqarnissaat nalilerneqarpat pitsaanerpaamik aningaasatigut naleqquttumik suliarineqarsinnaaffianni aammalu innuttaasut ajunnginnerpaamik sullinneqarnissaat qulakkeerniarlugu.

Sukumiinerusumik paasisaqarusukkuit attavigikkit:

Pisortaq Martha Labansen, oqarasuaat 36 21 00, e-mail: mala@kanukoka.gl
Immikkut siunnersorti Peter S. Olsen, oqarasuaat 34 51 22, e-mail: pols@nanoq.gl