Kommunit innuttaasunik kiffartuussisussaatitaanerminnut atatillugu akileraarutinik aalajangersaasinnaatitaanerminnut periarfissaat tunngaviusutigut allanngortinniarneqarput. Piffissami namminersulivinnissamik anguniagaqarfiusumi kommunit tamatuminnga anguniagaqarnermi peqataanissaminnut periarfissaat ajornakusoornerulissapput. Sulisartut nunanit allaneersut salliutinneqassapput.
Ilaatigut taamaattunik oqaaseqaateqarlutik kommunit ataatsimoorlutik akissuteqaqqammerput aningaasarsianit akileraartarnermi inatsisip allannguutissaa pillugu Namminersorlutik Oqartussat tusarniaanerannut. Kommunit piumasaraat naalakkersuisut inatsisissatut siunnersuut tunuartissagaat.
Inatsisissatut siunnersuummi pineqartoq tassaavoq soorlu erngup nukinganik innaallagissiorfiliornerni aluminiumimillu aatsitsiviliornermi kiisalu aatsitassanik piiaanermi sulisartut nunanit allaneersut nutaamik akileraaruserneqassasut isertitat tamakkiisut tunngavigalugit. Isertitanit tamakkiisunit akileraarut taanna 30 procentiussaaq, maanna aningaasarsianit akileraarutinik aaqqissuussinermut atuuttumut taartaassalluni, tamakkerlunilu nunatta karsianut nakkartinneqartassalluni. Allannguut atuutileriissaaq 2010-mi juulip aallaqqaataaniit.
Inatsisissatut siunnersuut akuerineqassappat nunatsinni inuiaqatigiinni siunissami ineriartortitsiviusuni isertitatigut pissarsiassat kommunit annikitsuinnarmik ilangeeqataaffigissavaat. Tamannalu naapertuutinngilaq pisortat ingerlatsineranni suliassat agguataarneqarnerannut, tassa kommunit ilaatigut meeqqeriveqarnerup, atuartitsinerup utoqqarnillu isumaginninnerup pitsaasumik naammattumillu ingerlanneqarnissaat isumagiuartussaammatigit.
Kommunit eqqumiiginartippaat naalakkersuisut Akileraartarnermut Atugarissaarnermullu kommissionimik pilersitsereerlutik taassumalu qanoq inassuteqarumaarnissaa utaqqimaaqqaarnagu akileraartarnermi inatsisinik taama annertutigisumik allannguinialernerat.
Inussiarnersumik
Enok Sandgreen
KANUKOKA-p siulittaasua
