Aningaasaqarnermut Naalakkersuisoq Palle Christiansen aamma KANUKOKA-p siulittaasuaEnok Sandgreen 2010-mi kommuninut ataatsimoortumik tapiissutissat pillugit isumaqatigiissummik ullumikkut atsiugaqarput. 2010-mi kommuninut ataatsimoortumik tapiissutit 789,3 mio. koruuniupput.
2009-mi ukiakkut tusagassiutitigut aammalu illua´tungeriit saqqummiuttagaasigut tusaaneqarsinnaavoq Naalakkersuisut KANUKOKA-llu 2010-mut Kommunit ataatsimoortumik tapiissutissaannut isumaqatigiissutissap anguniarnera ajornakusoorsimasoq.
Inatsisartunit 2010-mut Aningaasanut inatsisissap akuerineqannginnerani isumaqatigiinnissaq anguneqanngitsoorpoq. Taamaammat isumaqatigiissutip ullumikkut atsiorneqartup imarisaa aningaasaliissutinut konto pingaarnerup, 20.05.20 Kommuninut ataatsimoortumik tapiissutit, iluani Inatsisartut Aningaasanut Inatsit 2010 pillugu akuersissuteqarneranni erseqqissaaneruvoq.
Illua´tungeriit isumaqatigiinngissutigineruaat ataatsimoortumik tapiissutit 2010-miit 30 mio koruuninik appartinneqarnissaat. Illua´tungeriit akornanni isumaqatigiinngissutaasut isumaqatigiissummi atsiorneqartumi erseqqinnerusumik allaaserineqarput, taakkulu uani atuarneqarsinnaapput: www.kanukoka.gl aamma www.nanoq.gl.
Nalakkersuisut aamma KANUKOKA ataatsimoorlutik aaqqissuussaanermut iluarsartuusseqqinnerup suliniutigineqarnerata ingerlaqqinnissaanut qilanaarput, tassanimi anguniakkat ilagimmassuk Namminersorlutik Oqartussat kommunillu akornanni suliassat tulluarnerpaamik agguataarneqarnissaasa anguneqarnissaa. Naalakkersuisut Inatsisartut 2010-mi upernaakkut ataatsimiinneranni kommunit pillugit nassuiaammik saqqummiussaqarniarput. Nassuiaatip aaqqissuussaanermut iluarsartuusseqqinnerup suliarineqarnerata ingerlaqqinnissaanut pingaaruteqarnissaa ilimagineqarpoq.
Isumaqatigiissut atsiorneqartoq www.kanukoka.gl -imi aamma www.nanoq.gl -imi atuarneqarsinnaavoq. Sukumiinerusumik paasisaqarusukkuit Aningaasaqarnermut pisortaq Peter Beck, telefon 34 52 01-mut imaluunniit pisortaq Martha Labansen, telefon 3621 00-imut attavigisinnaavatit.
(atsiortut)
Palle Christiansen
Aningaasaqarneq pillugu Naalakkersuisunut ilaasortaq
Enok Sandgreen
Kalaallit Nunaanni Kommunit Kattuffiannut siulittaasoq
