Ilulissat, 20. maaji 2010
Naalakkersuisut, borgmesterit aamma KANUKOKA-p siulersuisuisa ullumi ataatsimeeqatigiinneranni pilersitsisoqarpoq suliassaqarfinnik Namminersorlutik Oqartussanit kommuninut nussuinissami pisortallu suliassaqarfiisa aaqqissuussaanerannik iluarsaaqqinnerup ingerlaqqinnissaani politikkikkut ataqatigiissaarisussanik.
Ataqatigiissaarisunut ilaasortanngorput Naalakkersuisut siulittaasuat Kuupik Kleist, nunami namminermi pissutsinut naalakkersuisoq Anthon Frederiksen, Qeqqata Kommuniani borgmesteri Hermann Berthelsen aamma Kalaallit Nunaanni Kommunit Kattuffianni siulittaasoq Enok Sandgreen.
Taamatut ataqatigiissaarisoqatigiinnik pilersitsineqarpoq aaqqissuussaanermik iluarsaaqqinneq Namminersorlutik Oqartussat kommunillu suleqatigiissutissarimmassuk taamalu iluarsaaqqinnerup suliassaqarfinnik kommuninut nussuinertaata ataavartumik ataqatigiissumillu pinissaa illua'tungeriinnit qulakkeerusunneqarmat.
KANUKOKA aamma Nunami namminermi pissutsinut Naalakkersuisoqarfik ataqatigiissaarisunut allattoqarfiussapput.
Inussiarnersumik
Enok Sandgreen
KANUKOKA-p siulittaasua
Kuupik Kleist
Naalakkersuisut siulittaasuat
