Ilaanniuna uungaannaq ikilileriniartut matooraaniartullu tulleriiaatiinnalivissartut. Aningaasaqarnermut naalakkersuisoq Palle Christiansen assut noqasussimavoq kommuninut ataatsimoortumik tapiissutit ikililerumallugit, maannalu Inatsisartunut ilaasortaq Niels Thomsen piumasaqarujoq kommunit kattuffiat KANUKOKA matuneqaqqullugu.
Angutit ataqqinartut taakku eqqissisarusuppavut oqarfigalugit kommunit namminneerlutik aallartereersimammata KANUKOKA-p ilusaata ingerlanneqarneratalu kommunit aaqqissuussaanerannut nutaamut naleqqussarlugu qanoq iluarsineqarsinnaanera isumaliutigalugu. Tamanna siornali aallartitat ataatsimiinneranni sammineqarpoq, tamannalu nangillugu siunnersuutinik erseqqissunik saqqummiussisoqartussaavoq maajimi aallartitat ataatsimiinnissaannut, kommuninit ataasiakkaanit siunnersuutit tunngavigalugit.
Pisortat suliassaqarfiisa aaqqissuunneqarnerata nutaap kommunit kattunnerannik ilaqartup aallartisarnerani qitiusumillu oqartussat suliassaqarfiinik tigusinissap piareersarneqarnerani KANUKOKA-p ataqatigiissitsisutut atuunnera naleqartorujussuuvoq.
Qaammatini kingullerni KANUKOKA-p katersuuffittut pisariaqarnera erseqqissilluinnarsimavoq - pingaartumik eqqarsaatigalugit kommuninut ataatsimoortumik tapiissutit naalakkiummik ikililerneqarneri aammalu aningaasarsianit akileraarutinut inatsisissamik saqqummiussisoqarnera. Tassani KANUKOKA kommunit ataatsimoornerannik takussutissiisimavoq kommuneqarnikkut innuttaasut oqartussaaqataanerannik illersuinermigut, naalakkiiniarpalaartumillu pissusilersorluni isumaqatigiinniartarnernik avaqqutsiniarnermut iliuutsinullu kommunit namminersorsinnaatitaanerannik navianartorsiortitsisinnaasunut akerliliinermigut.
KANUKOKA-p inissisimaffia oqaluuserineqartarsimaqaaq. Qilanaarpugullu oqallisigeqqissallugu kommunit piumasaat pisariaqartitaallu tunngavigalugit qanoq naleqqussarneqassanersoq. Nuannareqqusaarluni oqaaserpassuit suullu tamarmik ikililerinikkut matooraanikkullu aaqqinneqarnissaannik takorluukkat puuffiginaveersaaginnassavavut.
Enok Sandgreen
KANUKOKA-p siulittaasua
