Allakkat ammasut
Suliassaqarfinnik kommuninut nuussinissap piareersarneqarnerata ingerlaqqinnissaa pillugu
Ataqqinartoq Naalakkersuisut siulittaasuat,
Borgmesterit aamma Kalaallit Nunaanni Kommunit Kattuffiata siulersuisuisa matumuuna illit Naalakkersuisooqatitillu ataatsimeeqatigerusukkaluarpaasi suliassaqarfinnik kommuninut nuussinissap piareersarneqarnerata ingerlaqqinnissaa pillugu, pisortat suliassaqarfiisa aaqqissuussaanerannik iluarsaaqqinniarnermut tamarmut tunngatillugu.
Taamatut ataatsimeeqatiserisariaqalerpatsigit maanna takusinnaaleratsigu aaqqissuussaanermik iluarsaaqqinneq ingerlateqqinniarlugu suut iliuuserineqassanersut suullu siunniunneqassanersut ataatsimoorluni erseqqissarneqartariaqalersut.
Matumuuna innersuussutigerusuppavut ulloq unnuarlu paaqqinnittarfiit Namminersorlutik Oqartussaniiginnarallarnissaannik Naalakkersuisut aalajangersimanerat aammalu Piareersarfiit EU-mik isumaqatigiissut pissutigalugu kommuninut tunniunneqassannginnerannik nalunaarut. Kiisalu taasariaqarpoq tigusinissami tunngavissarititaasut naammaginannginnerat pissutigalugu kommunit imerajuttunik katsorsaaveqarnermik tigusinissartik tunuarsimaarfigisimammassuk.
Taasariaqarportaaq 2010-mi aningaasanut inatsimmut tunngatillugu aamma soorlu alumiumimik aatsitsitsiviliornissami suliartortussat allamiut qanoq akileraaruserneqartarnissaannik inatsisissatut siunnersuummut tunngatillugu oqaaserineqartutigut iliuuseriniakkatigullu malunnarsimmat kommunit qitiusumillu oqartussat akornanni nammagassatigut suliassatigullu agguataarineq tunngaviusutigut allanngortinniarneqartoq.
Tamakku tamaasa pissutigalugit apererusunnarsivoq aaqqissuussaanermik iluarsaaqqinneq kommunit maannamut nukissorfigalugulu piffissamik atuiffigereersimaqisaat Naalakkersuisut tamarmiullutik sumut atorniarneraat. Tassami iluarsaaqqinnermi tassani pineqartoq tassaaginnanngilaq kommunit kattunnerat, aammali pineqarluni Namminersorlutik Oqartussat ingerlatanik suliassanillu siunertamut naapertuuttumik kommuninut tunniussuissasut.
Pisortat suliassaqarfiisa aaqissussaanerannik iluarsaaqqinneq innuttaasut pillugit kommunit aamma Namminersorlutik Oqartussat ataatsimoorlutik isumagisassarimmassuk pingaaruteqartorujussuuvoq suleriaqqinnissami tunngavissat siunertallu erseqqissarneqarnissaat. Ataatsimeeqatigiinnissaq kissaatigisarput erseqqissaanermut tamatumunnga atorneqassaaq.
Ataatsimiinnermik taamaattumik aaqqissuussiniarneq pisariukujuttarpoq. Siunnersuutigaarput tamanna pissasoq Nuummi arfininngornermi apriilip 24-ani.
Borgmesterit KANUKOKA-lu sinnerlugit inuulluaqqusillunga
Enok Sandgreen
KANUKOKA-p siulittaasua
