Ullumikkut Naalakkersuisut kommunillu siunissami suliassaqarfinnik nussuinissaq aningaasartassaanullu tunngasut oqaloqatigiissutigaat. Naalakkersuisut kommunillu ukiup ingerlanerani aappaagulu siunnersuusiorfigissavaat akissussaaffiit sorliit kommuninut tunniunneqassanersut.

Ilanngullugit oqaloqatigiissutigineqarput periarfissaqarnersoq suliassaqarfiit ataasiakkaat tulleriiarlugit kommunimut ataatsimut arlalinnulluunniit nussorneqarsinnaanersut taamaasilluni pimoorullugu suliassaqarfimmik nuussuinermi misilittagaqalernissaq anguniarlugu kommuninut tamanut suliassaqarfinnik nussuilinnginnermi.

Naalakkersuisut kommunillu pingaartilluinnarpaat suliassaqarfinnik nussuinissami piareersarneq pitsaasumik ingerlajumaartoq taamaasilluni kommunit isumannaatsumik suliassaqarfinnik tigusisinnaaqqullugit innuttaasullu sapinngisamik ajunnginnerpaamik pisortat tungaanniit sullinneqarsinnaaqqullugit.

Illuatungeriit isumaqatigiissutigaat piaartumik suliassanik tulleriiaarinissaq aalajangersarneqassasoq taamaasilluni nussuinissap sukkassusissaa aalajangersarneqassammat.

Ataatsimiinneq paaseqatigiiffiuvoq ataqqeqatigiilluni ingerlanneqartoq, illuatungeriit Naalakkersuisut kommunillu isumaqatigiissutigaat siunissami oqaloqatigiinnerit suleqatigiinnerillu aamma taamatut nanginneqarumaartut.