Aningaasaqarnermut Naalakkersuisoq Palle Christiansen aamma KANUKOKA-p siulittaasua Enok Sandgreen ullumikkut kommuninut 2011-imut ataatsimoortumik tapiissutissat pillugu isumaqatigiissut atsioqatigiissutigaat. Kommuninut 2011-imi ataatsimoortumik tapiissutit 741,0 mio. kr.-inik annertussuseqassapput.

Naalakkersuisut Inatsisartut 2010-mi ukiaanerani ataatsimiinneranni Isertitanit tamakkiisumik akileraarutit nunatta avataaniit suliartortartut akileraartalernissaannik siunnersuut saqqummiuppaat, inuit pineqartut illoqarfiit nunaqarfiillu avataanni aatsitassarsiornermi sanaartornermiluunniit sulisorineqarneranni atortuutinneqartussaq. Illuatungeriillu isumaqatigiissutigaat Isertitanit tamakkiisunit akileraarutit ukiumoortumik ataatsimoortumik tapiissutit Namminersorlutik Oqartussat kommunillu akornanni isumaqatigiinniutigineqartarneranni ilaatinneqartalissasut, kommunit aamma assersuutigalugu aatsitassarsiornermi suliniutaasunut aningaasartuuteqartartussaammata, Isersitanit tamakkiisunit akileraartarnermi attuumassuteqartunik.

2011-imut aningaasanut inatsisissatut siunnersuummi Naalakkersuisut siunnersuutigaat kommuninut ataatsimoortumik tapiissutit 2011-imi 8 mio. kr.-inik appaavigineqassasut. Kommunit ataatsimoortumik tapiissutit appaavigineqarnerat naapertuuttutut isigingilaat. Tamanna minnerungitsumik kommuninut 2010-mi ataatsimoortumik tapiissutit 30 mio. kr.-inik appaavigineqarnerannut sanilliullugu isiginiagassaavoq. Illuatungeriit pissutsit taamaannerat isumaqatigiinngissutigaat. Illuatungeriit isumaqatigiingissutigisaat isumaqatigiissummi atsiorneqarsimasumi atuarneqarsinnaavoq, uani www.kanukoka.gl aamma www.nanoq.gl.

Annertunerusumik paasisaqarniaraanni attavigineqarsinnaapput: Naalakkersuisoqarfimmi pisortaq Jan H. Lynge-Pedersen oqarasuaammi 34 52 03 imaluunniit Pisortap tullia Karl Davidsen oqarasuaat 36 21 00.

Palle Christiansen Aningaasaqarnermut Naalakkersuisoq

Enok Sandgreen Kommunit Kattuffianni siulittaasoq