Pisortat suliassaqarfiisa aaqqissuussaanerannik iluarsaaqqinnerup kommunit kattunnerannik ilaqartup ukiuisa aappassaat aallarteriikatappoq. 2009 ukiuusimavoq sutigut tamatigut immikkukajaaq ittoq, kommunerujussuit nutaat sisamat aallartisarfigisaat kommuninilu aaqqissuussinerup allanngortiterneqarfia. Aamma ukiuuvoq politikkikkut aalassassimaarfiusoq, tassa Namminersorlutik Oqartussat kommunillu 2010-mi kommuninut ataatsimoortumik tapiissutissat ajoraluartumik isumaqatigiissutiginngitsoormatigit.
Kommunini nutaani naalakkersuinikkut allaffissornikkullu ingerlatsisut nersualaagassaapput innuttaasut sullinneqarnerata pitsanngorsarneqarnissaanik assigiissarneqarnissaanillu ilungersuuteqarsimanerat pillugu, tamannami aaqqissuussaanermik iluarsaaqqinnermi kommunit peqataanerminni siunertaasa pingaarnersarimmassuk.
Siunertaq pingaarneq tamanna aalajangiusimavarput. Tamanna erseqqissarusuppara sipaarniarnerup iluarsaaqqinnermi siunertani pingaarnersaaneranik ukiumi qaangiuttumi oqaluttarsimasut illua’tungilerusukkakkit.
Pingaarportaaq eqqaamassallugu aaqqissuussaanermik iluarsaaqqinneq aamma nunap immikkoortuini ineriartortitsilluarnerunissamik siunertaqarmat, aningaasarsiornikkut isumaginninnikkullu. Taamatut ineriartortitsinissaq – innuttaasunik sullissinerup pitsanngorsarneqarnissaani naligiissarneqarnissaanilu pingaaruteqanngitsuunngitsoq – minnerunngitsumittaaq qitiusumit oqartussaasunit tapersersorneqartariaqarpoq, tassami aaqqissuussaanermik iluarsaaqqinneq Namminersorlutik Oqartussat kommunillu ataatsimoorlutik suliassarimmassuk.
Naalakkersuisut siulittaasuat akuersaarusupparput ukiortaami oqaaseqarnermini taammagu meeqqanik inuusuttunillu isumaginninnermi pilersaarutinik piviusunngortitsiniarnermi kommunit qitiulluinnartuusut. Kommunit qitiulluinnartumik inissisimanertik tamanna ilisimaarilluarpaat. Tamanna ilaatigut takutinneqarpoq ilaqutariit meerartallit isumagineqarnerat pillugu KANUKOKA 2009-mi februaarimi isumasioqatigiissitsimmat, tamannalu qujanartumik ukioq taanna upernaakkut Inatsisartunut qineqqusaarnermi isumassarsiviulluarsimammat.
Naalakkersuisut siulittaasuata aamma taavaa ”kommunit kattussuunneqarnerisa kingorna suliassatut aalajangiussat arlalitsigut kinguaattooruteqartut.” Tamatumani eqqarsaatigisaa tassaavoq suliassaqarfinnik Namminersorlutik Oqartussanit kommuninut nuussinissaq.
Eqqortussaq pillugu erseqqissartariaqarpoq suliassanik aalajangiussanik assigiinngitsunik eqqortitsinissamut apeqqutaammat suliassaqarfiit nuunneqartussat qulaajarneqareersimanersut tamatumalu kingorna aningaasatigut tunngavissat erseqqissut tunngavigalugit neqerooruteqartoqarsimanersoq. Suliassaqarfiit siulliit pineqartut pillugit aatsaat 2009-ip naalernerani taamatut pisoqarpoq. 2009-mi upernaakkut Inatsisartunut qinersisoqarnerata tamatumalu kingorna politikkikkut allaffissornikkullu inissinniarnerup kommuninit sunniuteqarfigineqanngitsup kingornatigut Namminersorlutik Oqartussanut kommuninullu paasinarsisimavoq suliassaqarfiit 2010-mi januaarip aallaqqaataani nuunneqartussatut eqqarsaatigineqartut piffissami tassani nuunneqarsinnaassanngitsut. Taakkua saniatigut kinguaattoorutinik allanik ilisimasaqanngilagut. Naalakkersuisulli kommunit suleqatiserimmatigit ”nutaamik piviusorsiortumillu pilersaarusioqqinnissami peqataaqqullugit”, ilumoorluta ukiortaami kissaatigisarput tassaavoq Namminersorlutik Oqartussat kommunit piumasaannut akuersaassasut. Tamatumanimi pineqarput innuttaasunik sullissineq nunallu immikkoortuini ineriartortitsineq, pitsanngorsarlugit suleqatigiissutissavut.
Tamassi ukiortaami pilluaritsi!
Enok Sandgreen
KANUKOKA-p siulittaasua
