|
Ukiumoortumik ataatsimiititsinerit uku KANUKOKA-mit isumagineqartarput:
Aallartitat ataatsimiinnerat
Borgmesterit kommunaldirektørillu ataatsimiinnerat
Inunnik isumaginnittut pisortaasa ataatsimiinnerat
Aningasaqarnikkut pisortat ataatsimiinnerat
Kommuneingeniørit ataatsimiinnerat
Atuarfinni pisortat ataatsimiinnerat
Aammattaaq pikkorissarnerit allat kommunit pisariaqartitaat ingerlanneqartarput, kiisalu ataatsimeersuarnernut ukiumoortunut atatillugu pikkorissaasoqartarluni.
1. Aallartitat ataatsimiinnerat
Aallartitat ataatsimiigiartarnerini angalanermut, ineqarnermut, nerisaqarnermut, aqqutaani unnuinernut ullormusiassanullu aningaasartuutit KANUKOKA-mit akilerneqartarput. Angalanissanut pilersaarutaareersut naapertornagit angalanerit kommuninit akilerneqassapput. Kommunit tamarmik ataatsimik aallartitaqarput, Nuummiilli aallartitat pingasuupput, Sisimiunillu marluk. Aallartitat ataatsimiittarnerannut maleruaqqusat takukkit .
Aallartitat adressii, cpr-normui, akileraarnermut allagartaat aningaaserivinnullu kontui KANUKOKA-mut nassiunneqassapput. Aamma kommunip uppernarsassavaa aallartitaq namminersorluni inuussutissarsiortuusoq. Akissarsiallit sulinermikkut akissarsiassaraluaminnik annaasatik taarsertissinnaavaat sulisitsisup uppernarsaateqarneratigut.
1.a Aallartitat ataatsimiinnerini alaatsinaattut, qaaqqusat il.il.
Aallartitat ataatsimiinnerini allat, soorlu kommunaldirektørit, kommunalbestyrelsini ilaasortat, qaaqqusat, allallu alaatsinaattut, angalanissartik, ineqarnissartik nerisaqarnissartillu namminneq inniminnertussaavaat akilerlugillu. Peqataasussat inissaat qulakkeernialugit, KANUKOKA-mit inissat nerisaqarnissallu siumut inniminnerneqartarput. Peqataaniartut KANUKOKA-mut nalunaartassapput.
2. Borgmesterit kommunaldirektørillu ataatsimiinneri
Angalanissat, unnuisarnissat nerisaqarnissallu nalinginnaasumik kommunit namminneq inniminnertarpaat akilerlugillu. Ilaatigulli angalanissat ataqatigiissaarluarneqarnissaat pisariaqaraangat, soorlu angallanneqarnissaat ataatsimoortumik pisussaagaangat imaluunnit angallatinik attartartortoqassatillugu, akiligassat avitseqatigiinnikkut aaqqissorneqartarput. Takuuk imm. 4.
3. Ataatsimiinnerit allat, pikkorissarnerit, ataatsimeersuarnerillu
Ingerlatsivinni pisortaasut ukiumoortumik ataatsimeersuartarneri akiligassanik avitseqatigiinnikkut aaqqissorneqartarput., KANUKOKA-millu angalanissat, ineqarnissat nerisaqarnissallu isumagineqartarlutik.
4. Akiligassanik avitseqatigiineq
Akiligassanik avitseqatigiittoqartillugu, angalanernut ataatsimiinnermilu aningaasartuutinut kommunit amerlaqatigiinnik akiligassinneqartarput. Ataatsimiinnissanut aningaasartuutissat KANUKOKA-mit akileqqaarneqartarput, ataatsimmiinnissalli piviusunngorsinnaanera qulakkeerniarlugu KANUKOKA-mit angalanissanut ataatsimiinnissamullu aningaasartuutissat kommuninut siumoortumik akiligassanngortinneqartarput. Ataatsimiinnerilli aatsaat naammassigaangata siumut akiliutaasimasut aningaasartuutigineqavissimasullu assigiinngissutaat kommuninut akiligassanngortinneqartarput, annertunerusumillu siumut akiliisoqarsimatillugu sinneri utertinneqartarlutik.
5. Angalanissamut pilersaarutinik nammineq allannguineq
Malugeqquneqarpoq akiligassanik avitseqatigiinnikkut aaqqissuussinerit ataatsimiinissamut aalajangersimasumut aningaasartuutaammata. Taamaattumik nammineq allanngortitsinerit, allamik pisassaqarluni aqqutaani sivisunerusumik uninnganerit, illoqarfimmiluunnit ataatsimiiffiusumi sivisunerusumik uninnganerit KANUKOKA-p susassarinngimmagit, immikkut akiligassat kommuninut akiligassanngortinneqartarmata.
6. Peqataaniarluni nalunaarnerit allanngortinneqarsinnaanngitsut
Ataatsimiinnissap piviusunngorsinnaanissaa qulakkeerniarlugu akunnnittarfimmilu ataatsimiinnermi aningaasartuutissat matussuserniarlugit kommunit immersugassamik nassinneqartarput, tassanilu peqataaniarluni nalunaarfissap ullua kingulleq, peqataassagaannilu siumut akiliutissap angissusia allassimasarput. Nalunaarfissap kingorna, siumut akiliutaasimasoq nalinginnaasumik utertinneqarsinnaaneq ajorpoq. Bilitsinulli akiliutaasimasut angalatitsivinnit aatsaat utertinneqarsinnaagaangata kommuninut utertinneqarsinnaasarput. Akunnittarfinnulli akiliutissat aatsaat utertinneqarsinnaasarput akunnittarfiup akiligassanngortissimanngikkaangagit, naak peqataanngitsoortoqarsimagaluartoq ”takkutinngitsoortunik”. Akiliutigisimasanik utertitsisoqassatillugu utertitsineq aatsaat pisinnaavoq ataatsimiinnerup naammasseerneratigut, ataatsimiinnermullu aningaasartuutiviusimasut naatsorsornerisa naammassereerneratigut. Bilitsit atunngitsuukkat KANUKOKA-mit inniminnikkat tamatigut KANUKOKA-mut utertinneqartassapput, nassuiaaserlugit sooq atunngitsoorneqarsimanersut.
7. Atatsimiigiartunut bilitsit
Bilitsit ataatsimiigianut naatsorsuussat nalinginnaasunillu akikinerusut aallartitat ataatsimiigiarnerinut, ataatsimeersuarnernullu allanut atorneqarajupput. Ataatsimiigiartunut bilitsit aallarnissamut ullut 14-iinnanngoraangata allangortinneqarsinnnaaneq ajorput. Aammattaaq aallarnissamut ullut 14-inngoraangata sananeqartarput, akiallu utertinneqarsinnaajunnaartarluni. Taamaattumik angalasussat qinnuigissavagut bilitsit inniminnikkat allangortitassanngikkaat KANUKOKA akuersititsinnagu.
8. Utoqqarnut bilitsit
Kikkut tamarmik 60-it sinnerlugit ukiullit akikinnerusunik bilitseqarsinnaapput. Taakku ataatsimiigiartunut bilitsinit akikinnerupput allanngortinneqarsinnaalutillu, atunngitsuukkallu akii utertinneqarsinnaasarput. Kommunit qinnuigaavut peqataatitaqarniarlutik nalunaaraangamik kikkut 60-it sinnerlugit ukioqarnersut nalunaarutigisaqqullugit, ukiuisalu uppernarsaataannik ilanngussisaqqullugit.
9. Ullormusiat
Aallartitat ullormusiaat KANUKOKA-mit akilerneqartarput, ataatsimiigiartarnerni allani ullormusiassat kommuninit akilerneqartarput. Nerisaqaatigaluni ineqarnerni ullormusiat ikilisakkat tunniunneqartarput.
10. Ataatsimiinnerup ataatsimut akia
Ataatsimiinnerup ataatsimut akia tassaavoq ataatsimeeqatigiinnermi ataatsimut aningaasartuutit, tassani ilaatinneqarlutik ineqarnermut, nerisaqarnermut, ininut ataatsimiiffinnut, nutserisunut, atortorissaarutinut, saqqummiisussanut il.il. Ataatsimut aningaasartuutit kommuninut agguataarneqartarput, kommune qassinik peqataasoqarsimanera tunngavigalugu..
11. Siumut akiligassat
Siumut akiligassat imarivai ataatsimiinnerup akia, angalanermut aningaasartuutit, ataatsimiinnissap pilersaarusiornera, saqqummiissussat nutserisullu akissarsiassaat angalanissaallu, kiisalu allaffeqarfimmiit peqataasussanut aningaasartuutit. Takuuk imm. 6 aamma 10.
12. Aqqutaani unnuinerit
Akiligassanik avitseqatigiinneq (takuuk imm. 4) atorneqanngikkaangat kommunit namminneq aqqutaani unnuinissat isumagisarpaat. Eqqaamallugu aqqutaani kinguaattoornermi akunnittarfiit unnuiffissat nalunaarfiginissaat. Akunnittarfiit amerlanerit ”takkutinngitsoortut” akiligassittarpaat.
13. Akunnittarfinni nammineq akiligassat
Ataatsimiinnerni pikkorissarnerniluunniit akunnittarfinni nerisaqarnerni imeq kisiat iggisissatut sassaalliutigineqartarpoq. Allanik iggiseqarnerni, oqarasuaatinut akiligassat il. il. KANUKOKA-p susassarinngilai, najugaqartullu namminneq aallannginnermi akunnittarfimmut akiligassarai.
14. Aapparisamikm meeqqanilluunniit angalaqateqarneq
Allanik angalaqateqarnerni angalanernut ineqarnernullu akiligassat KANUKOKA-p susassarinngilai.
| 
