Anthon Frederiksenip nunami namminermi pissutsinut, taamalu kommuneqarnermut, naalakkersuisutut kommunit akunnerminni qitiusumillu oqartussanut attaveqarnerminni qanoq aaqqissuusseriaaseqarnissaminnik namminneerlutik periarfissarsiornerat ataqqisariaqaraluarpaa.

Ataqqinninnerup taamaattup amigaataanera saqqummerpoq Naalakkersuisup tallimanngornermi februaarip 26-ani radioaviisikkut oqaaseqarneratigut. Tassani Kalaallit Nunaanni Kommunit Kattuffiat KANUKOKA sulinermut kigaalaqutaasutut taavaa, qitiusumillu oqartussaasut kommunillu toqqaannartumik oqaloqatigiittarnissaat pitsaanerunerarlugu.

Erseqqissartariaqarparput kommunit qitiusumillu oqartussaasut toqqaannartumik pitsaasumillu oqaloqatigiissinnaanerat kattuffiup akerlerinngisaannarsimammagu.

Kommunilli pisariaqartittuarpaat demokratii tunngavigalugu aqutseriaatsimi kommunit qitiusumillu oqartussaasut isumaqatigiissuteqartarnerannik tunngaveqartumi nukittorsaataasumik ataqatigiissaarisoqarnissaa. Tamatuma pisariaqarnera borgmesterit kommunaldirektørillu ataatsimiinneranni ingerlanneqaqqammersumi tamanit erseqqissarneqarpoq. Ataqatigiissaarinerullu pisariaqartup tamatuma aaqqissuussaanermut nutaamut qanoq naleqqussarneqarnissaa kommunit namminneq isumaliutigileruttorpaat.

Kommunit akunnerminni naleqqussaaniarnerannut pissusissamisoortumut tamatumunnga naalakkersuisunut ilaasortap akuliunnera naleqqutinngilaq.

Inussiarnersumik
Enok Sandgreen
KANUKOKA-p siulittaasua