Imarisamigut pisoqqamit allaanerunngilaq, imarisaali ullutsinnut naleqqunnerusumik isikkulerlugit saqqummiunneqarput.
Nittartakkap pisoqqap pitsaaqutai, "Nittartakkat pitsaaanersaasa ilaattut" nersornaatisissutigisimasai, nittartakkami nutaami attatiinnarusuppavut ineriartortikkusullugillu. Pisariitsoq paasissutissiilluartorlu - taama nalilerneqarsimavoq nittartagaq taanna pingaartumik kommunini tamani politikerit allaffissornermilu sulisut paasissutissanik aallertarfissaattut pilersinneqarsimasoq.
Nittartakkap pisoqqap imai nutaamut nuuginnarneqarsimapput, imaluunniit "kuiinnarneqarsimapput". Periarfissarli iluatsillugu arlalitsigut iluarsaassivugut, quppernerit atorfissaaruttutut taaneqarsinnaasut matoorarlugit. Ilaalli matugallaannarpavut iluarsaateriarlugit ammaqqissamaarlugit (www.kanukoka.gl tuusintinik arlalinnik qupperneqarami iluarsaannissaat pilaarnarsinnaasarami).
E-konferencit - oqallittarfiit matoqqasut
E-konferencit, tassa suliassaqarfinni assigiinngitsuni kommunini sulisut oqallittarfiisa matoqqasut, amerlanersaat suli nittartakkamiipput.
Kisianni oqallittarfinnik atuisut qaammatini kingullerni arfinilinni oqallittarfinnik atuisimanngitsut peerneqarsimapput. Taamaattumik oqallittarfimmi peqataaqqilerniaruit nalunaartariaqarputit. Aamma piffissami aggersumi e-konferencit misissoqqittussaavavut iluarserusullugit uummarissaqqikkusullugillu - immaqalu atorneqarpianngitsut matoorarlugit.
Browseri nutarteruk
Maluginiartariaqarportaaq nittartagaq nutaaq Internet Explorer-imik nutaanerusumik ammaateqaraanni aatsaat pissusissavimmisut isikkoqassammat.
Taamaattumik kaammattuutigaarput nittartagaq tamakkiisumik pissarsiaqarfigerusukkukku systemadministratorersi qinnuigissagit internetimut ammaat, browseri nutarteqqullugu - www.kanukoka.gl eqqumiitsumik isikkoqassanngippat. Browserimik nutarterineq akeqanngilaq.
Kommunitoqqat aqqi
Taava nittartakkap imarisaanut tunngatillugu: Nittartakkami allaaserisani dokumentinilu assigiinngitsuni suli kommunitoqqat innersuussutigineqartarput.
Tassami, aatsaat ukioq ataaseq sinnilaarlugu qaangiuppoq kommunit kattummata, allassimasunillu iluarsaasseqqissaarneq suli naammassinngilarput. Taamaattumik nittartakkamik atuisut naammagittaqqugaluarpavut, kommunitoqqat aqqinik naammattoorsigaangamik maluginiartaqqullugu qanga sumullu tunngatillugu nittartakkamut ilineqarsimanersut. Iluarsaaterusaassavavut.
