Borgmester Asii Chemnitz Narup tapersersuinnarsinnaavarput Inatsisartut Aningaasaqarnermut ataatsimiititaliaa pisortat suliassaqarfiisa aaqqissuussaanerannik iluarsaaqqinnermi eqqarsaatit qanoq ataqatigiinnerannik eqqaasissimammagu. Tassami iluarsaaqqinnermi isumaqatigiissutaasimasumi eqqarsaatit ataqatigiinnerat politikkikkut oqallinnerni iliuuseqartarnernilu puigoqqajaaginnarneqalerpata iluarsaaqqinniarnerup siunertarpiai qatangiinnassapput.
2009-mi ukiakkut Naalakkersuisut 2010-mi aningaasanut inatsisissatut siunersuutertik saqqummiummassulli borgmesterit KANUKOKA-llu pisariaqartilersimavaat sakkortukuluttunik oqaaseqarlutik matuminnga eqqaasitsinissartik: Aaqqissuussaanermik iluarsaaqqinnerup siunertaanut qanorlu ingerlanneqarnissaanik eqqarsaatinut naapertuuttumik aningaasanut politikkeqarnissaq qanoq pisariaqartigisoq.
Tassami kommunit kattunnissaat siunertatut immini pingaarnerunngilaq, kisiannili siunertat pingaarnerusut anguniarneranni sakkussaavoq pingaaruteqartoq - tassa innuttaasunik sullissineq pitsanngorsarneqassasoq inuiaqatigiinnilu suliassat nikisinneqassasut Namminersorlutik Oqartussat suliassaasa toqqaannarnerusumik innuttaasunut tunngassuteqartut kommuninut tunniunneqarnerisigut.
Taamaalilluni aaqqissuussaanermik iluarsaaqqinneq kommunit aamma Namminersorlutik Oqartussat ataatsimoorussassaraat. Kommunit kattuttussaasimapput suliassanik tigusassaminnik kivitsilluarsinnaaneruniassagamik. Taavalu Namminersorlutik Oqartussat ingerlatsinikkut sanaartornikkullu suliassaatitik aningaasaleeqataassutitut kommuninut tunniutissavaat, taamaalillutik sipaaruteqarnissamik aningaasartuutikillisaanissamillu siunertat iluarsaaqqinnermut ilaasut tunngavissaqalerniassamata.
Taamaattumik pissusissamisoorpoq Kommuneqarfik Sermersuup borgmesteriata kissaatigimmagu suliassaqarfinnik tunniussuinissaq kinguarsaqqinneqarani ingerlanneqassasoq.
Taamaattumik-una aamma isumakuluummernartoq nunami namminermi pissutsinut naalakkersuisoq Anthon Frederiksen aamma isumaginninnermut naalakkersuisoq Maliina Abelsen sapaatip-akunnerata kingulliup naanerani kommuninut KANUKOKA-mullu nalunaarmata meeqqanut inuusuttunullu kiisalu innarluutilinnut ulloq unnuarlu paaqqinnittarfiit Namminersorlutik Oqartussanit tigummineqaannarallassasut.
Taamatut isummerneq piffissami aggersumi Namminersorlutik Oqartussanit tusartualissagutsigu aaqqissuussaanermik iluarsaaqqinneq isumannarsisimassaaq.
Inussiarnersumik
Enok Sandgreen
KANUKOKA-p siulittaasua
