Inatsisartut Aaqqissuussaanermut isumalioqatigiissitat unnersuussutaat 2004-imi ukiakkut ataatsimiinnerminni eqqartorpaat. Unnersuussutip imaraa, kommunit anninngorlutik katiterneqassasut soqutigalugit inuussutissarsiornikkut assigiissutaat, sinerissami sumi inissisimanerat, pisortat suliassaasa naammassineqartarnerisa pitsaassusaat, assartuinermut pilersuinermullu periarfissat aammalu aningaasatigut imminut akilersinnaassuseq.
Aaqqissuussaanermut isumalioqatigiissitat piaartumik nalunaarutigaat ilusiliaq A tassaasoq isumalioqatigiissitat isumaqarfigisaat pitsaanerpaamik takorluukkanik naammassinnissinnaasoq, Namminersornerullutik Oqartussanit ingerlatsinermut suliassanik nuussuinermi, pisortat suliassaasa naammassineqartarnerisa pitsaassusaannik piumasaqarnermi kiisalu aningaasatigut imminut akilersinnaassuseqarnermik piumasaqarnermi.
Ilusiliaq oqallinnernut arlalinnut pissutaasimavoq, annerusumik sinerissami qanoq inissisimaneq aammalu akunnaquteqanngitsumik suleqatigisinnaasanut tunngatinneqarsimalluni, aappaatigulli Aaqqissuussaanermut Isumalioqatigiissitat piumasaqaatitut pingaartissimasaat tamanit akuerineqarsimallutik. Takorluugaq ingerlatsinermut suliassat amerlanersaat Namminersornerullutik Oqartussanit nussorlugit iluatsissappat, kommunip qanoq mikitigisinnaaneranik killiliivoq suliassanik kivitsisinnaanera eqqarsaatigalugu.
Najukkani assigiinngitsuni ilusiliamut kissaatigisat arlallit timitalerneqarsinnaapput, takorluugaq pingaarneq annaanngikkaluarlugu. Taamaattumik Isumalioqatigiissitap ilusiliaq A taassumalu iluserisinnaasai allat pingasut unnersuussutigissavai, ilusiliat kommune katitanngorsinnaasut suliassanut nutaanut nukissallit. Ilusiliat taakku pingasut kommunalbestyrelsini inuiaqatigiinnilu nalinginnaasumik oqallisigineqarsimapput.
Aaqqissuussaanermut isumalioqatigiissitat suliaanik paasisaqarnerorusukkuit ataani atsiortunga saaffigineqarsinnaavunga, iml. www.kanukoka.gl/strukturudvalget aamma www.nanoq.gl qinerlerfigineqarsinnaapput.
Inussiarnersumik inuulluaqqusillunga
Martha Labansen
siulittaasoq
Ilanngussaq:
Aaqqissuussaanermut Isumalioqatigiissitat isumaqarsimapput ilusiliaq A takorluukkanik eqquutitsisinnaanerusoq, ingerlatsinermut suliassat amerlanersaat Namminersornerullutik Oqartussanit nussornissaat eqqarsaatigalugu, pisortat suliassaasa naammassineqartarnerisa pitsaassusissaat eqqarsaatigalugu kiisalu aningaasatigut imminut akilersinnaassuseqarnissamik piumasaqarnermi.
Avannaa (Kan, Aas, Qeq, Qas, Ilu, Uum, Upe, Qaa) 18.564-inik inulik
Qeqqa (Sis, Itt, Man, Amm) 13.190-inik inulik
Nuuk (Nuu) 14.715-inik inulik
Kujataa (Paa, Ivi, Nar, Qaq, Nan) 10.116-inik inulik
Kommunit katitat sisamat iluserisinnaasaat nutaat pingasut atsersimavagut ilusiliaq A1, A2 aamma A3. Ilusiliamut allannguut siulleq Avannaani, Qeqqani Nuummilu allannguuteqalaarput, Kujataanili taamaaginnarluni:
Avannaa (Aas, Qeq, Qas, Ilu, Uum, Upe, Qaa) 17.049-inik inulik
Qeqqa (Sis, Man, Kan) 11.127-nik inulik
Nuuk (Nuu, Itt, Amm) 18.293-inik inulik
Kujataa (Paa, Ivi, Nar, Qaq, Nan) 10.116-inik inulik
Iluserisinnaasat aappaanni kommunit ilaannut allannguuteqarpoq:
Avannaa (Aas, Qeq, Qas, Ilu, Uum, Upe, Qaa) 17.049-inik inulik
Qeqqa (Sis, Man, Kan) 11.127-inik inulik
Nuuk (Nuu, Itt, Amm, Paamiut illoqarfiat) 20.149-nik inulik
Kujataa (Ivi, Nar, Qaq, Nan aamma Arsuk) 8.260-inik inulik
Iluserisinnaasat pingajuat kujataanik allisitsivoq:
Avannaa (Aas, Qeq, Qas, Ilu, Uum, Upe, Qaa) 17.049-inik inulik
Qeqqa (Sis, Man, Kan) 11.127-inik inulik
Nuuk (Nuu, Paamiut illoqarfiat) 16.571-inik inulik
Kujataa (Ivi, Nar, Qaq, Nan, Amm, Itt aamma Arsuk) 11.838-nik inulik
