|
Ilulissat Qasigiannguillu kommuniisa sinniisaat isumalioqatigiissitanit qaaqquneqarsimapput kommunit taakkua suleqatigiinniarnerat oqaloqatigiissutigiumallugu. Ataatsimiinnermit tassannga ilaatigut paasinarpoq Qeqertarsuup tunuani kommunit allat siunissami suleqatigiinnermi ilaanissaat ammaffigineqartoq aammalu kommuninik kattuttoqarsinnaanera periarfissatut isigineqartoq.
Unnukkut Qasigiannguit katersortarfianni innuttaasunik ataatsimiititsisoqarpoq siunissami pisortat ingerlatsiviisa qanoq aaqqissuussaanissaat pillugu. Oqallinnerup ilangaatsiaani Ilulissat Qasigiannguillu kommuniisa kattussinnaanerat sammineqarpoq. Aammalu kommuninik kattussinikkut kommunip aappaanik atorunnaarsitsisoqarnissaanik eqqarsartarnerup eqqunngitsuunera ataatsimiinnermi tassani erseqqissarneqarpoq. Isumalioqatigiissitat Qasigiannguanukarnerminni Ilulissaniitillutik Peqqinnissamut Pisortaqarfimmiunik ataatsimeeqateqarput isumaginnittoqarfiup peqqinnissaqarfiullu suleqatigiinnerat pinerullugu. Maannalu isumalioqatigiissitat isumaginnittoqarfiup peqqinnissaqarfiullu akornanni suleqatigiissutissanik qulaajaanertik pimoorullugu aallartippaat. Aaqqissuussaanermut Isumalioqatigiissitat tullianik ataatsimiissapput borgmesterit kommunaldirektørillu ukiumoortumik ataatsimiinnissaat tamatumuuna Uummannami septembarip aallartilaarnerani pisussaq iluatsillugu. Isumalioqatigiissitat suliatik pillugit kommunit sinniisaannik oqaloqateqassapput innuttaasunillu ataatsimiititsissallutik. Aaqqissuussaanermut Isumalioqatigiissitat suliaat pillugit ataani atsiortoq paasiniaavigineqarsinnaavoq imaluunniit una paasisassarsiorfigineqarsinnaalluni: www.kanukoka.gl/aaqqissuussaanermut isumalioqatigiissitat
Inussiarnersumik
Martha Labansen
siulittaasoq |
