Ulrik Kjær Syddansk Universitetimi naalagaaffeqarneq pillugu ilisimatusarfimmi lektoriuvoq, ilisimatusarfigisimasaalu tassaapput kommunini qinersisarneq, kommunit angissusii kommuninilu politikereqarneq. Aaqqissuussaanermut Isumalioqatigiissitani atorneqartussamik nalunaarusiorsimavoq qulequtalimmik "Kalaallit Nunaanni kommunit kattussornissaat sumiiffinni inuit oqartussaaqataanerannit isigalugu".

Nalunaarusiaa siunnersuutitaqanngilaq qanorpiaq iliortoqarsinnaaneranik. Saqqummiussugaali tassaanerupput aaqqissuussinermik iluarsaaqqinniarnermi nalilersugassat apeqqutillu isumaliutigisariaqakkat.

Ulrik Kjærip nalunaarusiamini qulequttat uku sammivai: Sumiiffinni demokratii, nunap ilaani sumiissuseq tunngavigalugu sinniisoqarneq, nunaqarfinni aqutsisut aamma suliffeqarfinni siulersuisut kiisali kommunit aaqqissugaanerannut nutaamut ikaarsaariarfiup nalaa.