|
Aaqqissuussaanermut Isumalioqatigiissitat siunissami pisortat ingerlatsiviisa kommunillu qanoq aaqqissuussaanissaannik siunnersuusiornerminni piffissaqartitaanerunissaminnik kissaatigisaat isumalioqatigiissitat sulinerannut politikkikkut malinnaatitanit, naalakkersuisut siulittaasuannit Hans Enoksenimit, aningaasaqarnermut naalakkersuisumit Josef Motzfeldtimit, KANUKOKA-p siulittaasuanit Jens Lars Fleischerimit borgmesterimillu Agnethe Davidsenimit akuerineqarpoq.
Siunniunneqaqqaarsimagaluarpoq Aaqqissuussaanermut Isumalioqatigiissitat suliartik 2005-imi aasakkut naammassissagaat. Upernaaruli kommunalbestyrelsinut qinersinissaq isumalioqatigiissitat kommuninut attaveqarnerannik unikaallatsitsinngitsoornavianngimmat isumalioqatigiissitat kissaateqarsimapput suliamik ukiup affaata kingulliup ingerlanerani aatsaat naammassineqarnissaa akuerineqaqqullugu. Taamaalilluni pisortat ingerlatsiviisa aaqqissuussaanerannik iluarsaaqqinnissaq 2006-imi upernaakkut inatsisartuni oqallisigineqarsinnaassaaq. Taamalu kinguartitsinikkut kommunalbestyrelsit nutaat aamma piffissaqarnerulissapput isumaliutissiissutissami siunnersuuterpassuit oqallisiginissaannut. Qaammatini kingullerni Aaqqissuussaanermut Isumalioqatigiissitat kommunalbestyrelsinik ataatsimeeqateqartarnerat innuttaasunillu ataatsimiititsisarnerat ingerlalluarpoq. Nuummi kommunalbestyrelse tuaviuussinnginnissamik kissaateqarsimavoq aammalu Nuup illoqarfiit pingaarnersaattut siunissami inissisimanissaata eqqartorneqannginnera ippigisimallugu. Unnukkut innuttaasunik ataatsimiititsinermi malunnarpoq Aaqqissuussaanermut Isumalioqatigiissitat isumaliutaat soqutigineqartut aaqqiissutissatullu periarfissanik nalilersuinissamut piumassuseqartoqartoq.
Isumalioqatigiissitat kaammattuutigigallagaat Qaqortumi Narsamilu kommunalbestyrelsini ilaasortat innuttaasullu akornanni soqutigineqaqaat arlalitsigullu iluatinnartutut taakkartorneqarlutik. Maluginiarnarporlu siunissami Kujataa ataatsimoortumik kommuneqarfinngussagaluarpat nunaqarfiup Arsuup (Paamiut Kommunianniittup) aammalu Ivittuut Kommuniata tassunga ilanngunneqarsinnaanerat assut soqutigineqarmat. Aaqqissuussaanermut Isumalioqatigiissitat piffissami aggersumi Peqqinnissaqarfiup Isumaginnittoqarfiullu oqartussaaffiinik nalilersuinertik ingerlateqqissavaat ingerlatsivinnik siammarterisinnaaneq allatulluunniit eqaannerusumik aaqqissuussisinnaaneq eqqarsaatigalugit. Isumalioqatigiissitat piffissami aggersumi angalanissanik pilersaarutaat: Qeqertarsuaq, 13.-15. decembari 2004: Kangaatsiap, Aasiaat Qeqertarsuullu kommunii ataatsimeeqatigalugit. Innuttaasunik ataatsimiititsineq katersortarfimmi 14. decembari nal. 19.00. Sisimiut, 31. januaari - 2. februaari 2005: Sisimiut Maniitsullu kommunii ataatsimeeqatigalugit. Innuttaasunik ataatsimiititsineq. Tasiilaq, 2. februaari - 5. februaari 2005: Ammassallip Ittoqqortoormiillu kommunii ataatsimeeqatigalugit. Innuttaasunik ataatsimiititsineq.
Inussiarnersumik |
