Kommunit qanoq katitigaanissaannut periarfissat

Tamatuma kingorna isumalioqatigiissitat ataatsimeeqqipput, tamatumuunalu kommunit ingerlatsiviisa annerusariaqarnerannik aammalu innuttaasunik sullissinerup pitsaanerullunilu pisariinnerusariaqarneranik takorluukkat erseqqissarniarneqarput.
Aaqqissuussaanermut Isumalioqatigiissitat isumaqarput siunissami Namminersornerullutik Oqartussat inatsisiliornerinnarmik aallutaqartariaqartut suliassanillu ingerlatsineq nunap immikkoortuinut, tassa kommuninut, isumagisassanngortinneqartariaqarluni. Taamaalillutik borgmesterit kommunalbestyrelsillu maannakkornit iliuuseqarsinnaanerulerlutillu akisussaaffeqarnerulissapput. Assersuutigalugu sanaartorneq, peqqinnissaq kiisalu angallannermi assartuinermilu kiffartuussinermik isumaqatigiissuteqartarnerit nunap immikkoortuinut oqartussaaffigilersinneqarsinnaapput. Taamaassappalli kommunit kattunneqartariaqarput suliassanik naammassinnissinnaaleqqullugit, aammalu kommune ataaseq (nunap immikkoortua) minnerpaamik 7.000-inik inoqartariaqarpoq.

Isumalioqatigiissitat tikkuarusuppaat taamatut kommunit kattussuunneqarnissaannut periarfissat pingasut:

Periarfissaq A:

Disko + Avannaa (Kangaatsiaq, Aasiaat, Qeqertarsuaq, Qasigiannguit, Ilulissat, Uummannaq, Upernavik, Qaanaaq)

Kitaa + Tunu (Sisimiut, Maniitsoq, Ittoqqortoormiit, Ammassalik)

Kitaata Qeqqa (Nuuk, Paamiut, Ivittuut)

Kujataa (Narsaq, Qaqortoq, Nanortalik)

Periarfissaq B:

Disko (Kangaatsiaq, Aasiaat, Qeqertarsuaq, Qasigiannguit, Ilulissat, Uummannaq)

Kitaa (Sisimiut, Maniitsoq, Nuuk)

Kujataa (Paamiut, Ivittuut, Narsaq, Qaqortoq, Nanortalik)

Isorliit (Qaanaaq, Upernavik, Ittoqqortoormiit, Ammassalik)

Periarfissaq C:

Avannaa (Uummannaq, Upernavik, Qaanaaq)

Disko (Kangaatsiaq, Aasiaat, Qeqertarsuaq, Qasigiannguit, Ilulissat)

Kitaata Avannaa (Sisimiut, Maniitsoq)

Kitaata Kujataa (Nuuk, Paamiut, Ivittuut)

Kujataa (Narsaq, Qaqortoq, Nanortalik)

Tunu (Ittoqqortoormiit, Ammassalik)

Periarfissat taakku Aaqqissuussaanermut Isumalioqatigiissitat suleqqinnissaminni sammeqqinniarpaat aammalu kommunalbestyrelsinik ataatsimeeqateqartarnerminni innuttaasunillu ataatsimiisitsisarnerminni saqqummiuttassallugit.

Isumalioqatigiissitat pisortat ingerlatsiviini suliassat agguaateqqinneqarnissaannik kommunillu qanoq aaqqissugaanissaannik siunnersuusiassartik 2005-imi aasaanerani naammassereersimaniassavaat.

Inussiarnersumik