Isumalioqatigiissitamut suliakkiissutit

Kommunini periarfissat allanngornerat

Kommunalbestyrelsinut 1951-imi siullermik qinersinerup, nammagassat suliassallu agguataarnissaannut ataatsimiititaliap 1973-imi isumaliutissiissutaata kiisalu Kommunini Iluarsaaqqinnissamut Ataatsimiititaliarsuup 1994-imi isumaliutissiissutaata kingornatigut kommuneqarfiit aaqqissugaanerannut tunngaviusut annertuumik allanngorsimapput. Piffissap ingerlanerani ilisimasat nutaat, teknologiip allanngoriartornera kiisalu nutaanik inatsisiliornerit nassatarisaannik pisortanit sullinneqarnerit imarisaannut innuttaasut kissaatigisaat allanngoriartorsimapput. Tamatuma peqatigisaanik pisortat suliassaataasa naammassineqarnissaannut suliatigut tunngavissat allannguuteqarsimapput.

Ukiuni kingullerni kommunit arlaqartut kommunit killeqarfii apeqqutaatinnagit suleqatigiinnissat pillugit oqallinnernik aallartitsisarput kommunillu ilaat kommunit kattutsinneqarnissaat pillugu isumaliutersuutiminnik saqqummiussaqartarlutik. Kommunit ilaasa suliassaatitik Namminersornerullutik Oqartussat kommunilluunniit allat ikiortigalugit naammassisarpaat. Suliassanik naammassinneriaatsit nutaat tamakku paasissutissiisarnermut teknologiimit nutaamit ikorfartorneqarput.

Kommunit aqutsinerannut takorluukkat tunngaviusumillu pingaartitassatut naleqartitat

Kommunit suliassaminnik aaqqissuussinerat naammassinninnerallu qanimut oqartussaaqataanermut ikorfartuutaassaaq innuttaasullu nunaqarfinni illoqarfimmiluunniit najugaqarpata pitsaasumik sullinneqarnissaannut qularnaarissallutik. Kommunit suliassaatiminnik pitsaasumik naammassinninnissaanni anguniakkatut aalajangiussimasat pitsaanerpaamik akikinnerpaamillu anguneqarnissaat pineqarpoq. Tamatumunnga tunngavissaatitaapput kommunip aaqqissuussaanerata suliffittut kajuminnartuunissaa, piginnaasatigut ineriartornissamut qulakkeerisuunissaa sulisunillu sivisunerusumik suliffiusinnaanissaa.

Innuttaasut nunami sumi najugaqaraluarunilluunniit imminnut tunngasunik suliaritaqartut pisortani oqartussaasumit sorlermit sullinneqaraluarunilluunniit assigiimmik pineqartussaatitaapput. Kommuninik iluarsaaqqinnermik suliaqarnermi tunngaviulluinnartariaqarput inatsisitigut innarlitsaalineqarnissaq assigiimmillu pineqartussaatitaaneq, aamma aalajangeeqataasinnaatitaasannginnerup ajornartorsiutaasarnera ilanngullugu. Naalakkersuinikkut allaffissornikkullu kommunini ilusiliinerup misissueqqissaarfigineqarneranni paasissutissiisarnermi teknologiip atorneqarnera ilanngunneqassaaq.

Namminersorneq pillugu Isumalioqatigiissitap isumaliutissiissutaa tunngavigalugu aalajangiinerit Aaqqissuussaanermut isumalioqatigiissitap sulinermini tunngavinnut ilaatissavai.

Suliassaqarfiit marluk sammineqarnerat

Aaqqissuussaanermut isumalioqatigiissitamik pilersitsinissamut piareersaanermut atatillugu suliassaqarfiit marluk Piareersaanermut suleqatigiissitap tikkuarpai Namminersornerullutik Oqartussat kommunillu atorfilittaasa naalakkersuinikkut aalajangiiffigisassatut siunnersuutinik saqqummiussinissaq siunertaralugu misissuiffigilereersimasaat. Suliassaqarfiit taakku tassaapput:

1. Inatsisiliorneq. Suleqatigiissitaq pilersinneqarpoq kommunini aqutsineq pillugu inatsimmik misissuilluni aallartereersoq, siullertut suliassaralugit kommunit suleqatigiinnissaanni akornutaasinnaasunik piiaanissaq aammalu kommunit namminneq piumassutsiminnik kattunniarnerannik oqilisaasussaq. Inatsimmi allannguutissat siulliit suliarineqareerput. Tamannattaaq siunertaralugu inatsisiliat allat misissuataarneqassapput.

2. Paasissutissiisarnermi teknologii. Paasissutissiisarnermi teknologiip pisortani atorneqarnera misissuilluni sulinermi suliassat annertuut ilagaat. Paasissutissiisarnermi attaveqarnermilu teknologiip nutaap atornissaa siunisami kommunini ilusiliinermi nutaami suliassanik naammassinnittarnerup nutaamik isumaliutersuuteqarfigineqarnissaanni pingaarutilittut ilanngunneqassaaq.

Aaqqissuussaanermut isumalioqatigiissitamut suliassarititaasut

Piareersaanermut suleqatigiissitap kaammattuutigaa aaqqissuussaanermut isumalioqatigiissitaq sulianut paasisimasalik pilersinneqassasoq, taassuma suliarissallugu pisortat suliffeqarfiutaanni tamani suliassat naammassineqarnissaannut killiliussat allanngortinnissaasa aalajangiiffigineqarnissaannut tunngavissat teknikikkut suliatigullu misissoqqissaarnissaat.

Aaqqissuussaanermut isumalioqatigiissitap tunngaviusumik pingaartitassatut naleqartitat aallaavigalugit pisortat suliffeqarfiisa allatut ilusilerneqarnissaasa pitsaaqutai pitsaanngequtaalu naliliivigissavai taakkulu tunngavigalugit ukiorpassuarni atasinnaasunik allannguutissanik kaammattuuteqassalluni. Kommunit killeqarfii pioreersut akimorlugit suleqatigiinnissanut assigiinngitsunut kiisalu kommunit kattunnissaminnik aallartitsinissaannut periarfissanut ikorfartuutaasussat misissueqqissaarnerit ingerlanneqassapput siunnersuutillu saqqummiunneqassallutik.

Tamatumunnga atatillugu aaqqissuussaanermut isumalioqatigiissitaq piumaffigineqarpoq:

1. pisortat ingerlatsineranni nammagassat suliassallu agguataarneranni allannguutissanut periarfissat assigiinngitsut pitsaaqutaat pitsaanngequtaallu naliliivigeqqullugit

2 periarfissat assigiinngitsut aallaavigalugit nunap suatungaaniinnermut innuttaqassutsimullu tunngasut suut, matumanittaaq kommunit qanoq angitiginissaat, siunissami kommuninik aaqqissuussinissamut tunngaviutittariaqarnersut naliliivigeqqullugit siunnersuusiorfigeqqullugillu

Aaqqissuussaanermut isumalioqatigiissitaq sulinermini pisussaatitaavoq suliani pillugit Inatsisartunut, Naalakkersuisunut, kommuninut innutaasunullu paasissutissiisarnissamut. Aaqqissuussaanermut isumalioqatigiissitaq inuiaqatigiinni aalajangiisartut naalakkersuinikkut tunaartassatut tikkuagaat naapertorlugu sulisinnaajumalluni naalakkersuinikkut piginnaatitaanissaminik ujartuisassaaq. Tamanna assersuutigalugu pisinnaavoq 2004-p aamma 2005-ip qiteqqunneranni nalunaarusiortarnikkut. Sammisassat assigiinngitsut pillugit oqallissaarusiortoqartarsinnaavoq.

Aaqqissuussaanermut isumalioqatigiissitap suliani kingusinnerpaamik 2005-ip qeqqani naammassissavaa.

Aaqqissuussaanermut isumalioqatigiissitap inuttalersugaanera

Piareersaanermut suleqatigiissitap kaammattuutigaa Aaqqissuussaanermut isumalioqatigiissitaq Kalaallit Nunaanni inuiaqatigiit ineriartornerannut ilisimasaqarluartunit ilaasortalersugaassasoq. Inuit - sulianut ilisimasallit immikkullu ilisimasallit - Namminersornerullutik Oqartussat kommunillu suliaannik ilisimasaqartuussapput.

Toqqaaneq imatut pissaaq:

Inuit sulianut ilisimasallit pingasut siulittaasoq ilanngullugu KANUKOKA-p toqqagai.

Aaqqissuussaanermut isumalioqatigiissitap allaffissornikkut suliassaatai Namminersornerullutik Oqartussat Nunami namminermi pissutsinut Allaffianit KANUKOKA qanimut suleqatigalugu isumagineqassapput.