Ataatsimiititaliaagallartoq septembarimi pilersinneqarpoq pisortat suliassaqarfiinik aaqqissuusseqqinnissamik piareersaatit qanoq ingerlateqqinneqarnissaannik naalakkersuisut eqqarsaataat Inatsisartuni siullermeerutaasumik oqallisigineqareersullu.
Pilersaarutit sukumiisumik ataatsimiititaliami oqaluuserineqarsimapput, nalunaarusiamillu saqqummiussereermata iluarsaaqqinnissaq Inatsisartuni 15. novembari 2006 oqaluuserineqaqqippoq. Tassani ilaasortat najuuttut 23-usut ilaat 22-it suliap ingerlateqqinneqarnissaanik naalakkersuisut siunnersuutaannut akuersillutik taasipput. Ataaseq taaseqataanngilaq.
Partiit naalakkersuisooqatigiit pingajuat Atassut nangaasimagaluarpoq siunnersuummut tapersiinissaminut – ilaatigut nammineq piumassuseq tunngavigalugu kommunit kattussinnaanerannik partiip kissaatigisaa tunngavigalugu. Piareersaatilli ingerlaqqissinnaaqqullugit partii siunnersuummut akuersivoq – arlalinnilli suliap ingerlaqqinnerani isumannaarneqaqqusaminik kissaateqarluni.
Naalakkersuisut siulittaasuat Hans Enoksen Inatsisartuni oqallinnerup kingorna kommunit allagaqarpoq erseqqissaatigalugu kingusinnerpaamik ulloq 31. decembari 2006 kommunit sorliit sorlernut kattukkusunnertik Naalakkersuisunut nalunaarutigisariaqarmassuk. Allagaq taanna matuma ataani pineqarsinnaavoq pappialanut allanut ilagitillugu.
