Hans Enoksenimut Inatsisartullu aaqqissuussaanermik iluarsaaqqinnissaq pillugu ataatsimiititaliaannut allagaqarluni KANUKOKA-p siulittaasuata Lars Karl Jensenip ilisimatitsissutigisimavaa Avannaani kommunit tallimat kattunnissamik siunnerfeqarlutik ukiaq manna atsioqatigiissimasut.
Kommunit tallimat taakku nalunaarumminni kissaatigaat Avannaa qinersivinngortinneqassasoq ataaseq, taamaattorli maannakkut kommuniusut tamarmik kommunalbestyrelsini nutaani tamarmik immikkut kredsmandatimik ataatsimik isumannaariffigineqassasut.
Lars Karl Jensenimut akissummini naalakkersuisut siulittaaasuat isumaqarnerarpoq illoqarfinnut nunaqarfinnulluunniit aalajangersimasunut inissanik inniminniinikkut qinerseriaaseq equtinneqassasoq, tassa qinersinermi taasinerit tamarmik naligiikkunnaassammata.
"Tassunga tunngatillugu aamma isumaqarpunga kommunalbestyrelsinut nutaanut qinersinermi qineqqusaartut sumiuunertik pingaartinnerussappassuk taava imaaratarsinnaasoq qinigaasut illoqarfigisamik soqutigisaat sulissutigissallugit misigileriaannaasut. Tamanna kommunit angisuut ataatsimuulersinniarnerannut pitsaasuunngilaq, tassami ilaasortat peqatigiillutik kommunip anguniagai ineriartornermullu periarfissai sulissutiginiartussaagaluarmatigit," Hans Enoksen allappoq.
Lars Karl Jensenip Hans Enoksenillu allagaasa kopiivi matuma ataani pineqarsinnaapput.
