Narsap, Qaqortup Nanortallillu kommuuniinit kommunalbestyrelsit ulluni 24.-25. november 2006 ataatsimiinneranni aalajangerneqarpoq kommunit pingasuusut ulloq 1. maj 2009 aallarnerfigalugu kattunneqassasut. Arsuup Ivittuullu kommunimi nutaami ilaarusussappata, Paamiunut Nuummullu kattuteqatigiinnissamiit, Kujataani kommunimut nutaassamut tikilluaqquneqarput.
Tasiilap kommunianik Naalakkersuisunillu isumaqatiginninniarnerit aallartinneqarnissaat kissaatigineqarpoq Tunumi kommunit killeqarfiisa allanngortinneqarnissaat anguniarlugu, taamaalilluni Kujataani kommunit killeqarfiat Timmiarmiut eqqaaniilersillugu.
Tamatumani siunertarineqarpoq innuttaasut pitsaanerpaamik kiffartuunneqarnissaat. Suliassaqarfinni ataasiakkaani tamani kiffartuussinerit assigiinngitsut naleqqussarneqarnissaat sulissutigineqassapput, taamaalilluni innuttaasut kiffartuunneqarnerat assigiiaarsinneqalersinnaassammat. Tamanna pissaaq aningaasanut tunngasunik atugassarititaasut iluanni.
Kommunini pingasuusuni ataatsimut kommuninngornissamut akileraarutinut procenti naleqqussarneqassaaq. Ilutigalugu aningaasatigut pisussaaffiit pigisallu nalillit aningaasaqarneq eqqarsaatigalugu ersarissarneqassapput.
Ataatsimoortumik kommuninngortussaq kommuniussaaq siammagaq pingasunik pingaarnerusunik illoqarfittalik, tamarmik ataasiakkaarlutik naligiimmik ingerlatsivinnik aqutsisoqarfillit, illoqarfinni ataasiakkaani suliassaqarfinni ingerlatsivinni immikkoortoqarfiit kiffartuussiviillu atatiinnarneqartussaammata. Kommunit arlaanaataluunniit kissaatiginngilaa kommunit ataatsimuulersussat aningaasaataasa nutaanik allaffiliornernut sulisunulluunniit nuutitanut inissialiornernut atorneqarnissaat, paarlattuanilli innuttaasunut iluaqutissanngortinneqarnissaat.
Kommunit pingasuusut - sulisunut assigiimmik periuseqarnissamik kissaatigisaq aallaavigalugu - aalajangersimapput sulisut tamaasa atorfeqarneranni qularnaarunneqassasut, taamaalilluni sulisut kommunimut ataasiulersussamut nuuneqassallutik atorfeqaneranni atugassarititaasut allannguuteqartinnagit. Pingaaruteqarpoq sulisut toqqissisimanartunik atugassaqartinneqarnissaat kiisalu kattunnissamut suliaqarnermi peqataatinneqarnissaat.
Siunissami kommunimi ataasiusumi nunaqarfinni aqutsisut attatiinnarneqarnissaat isumaqatigiissutigineqarpoq, periarfissiisoqassallunili nunaqarfinni aqutsisut imminnut qanittut nammineq piumassusertik malillugu kattussinnaaneri.
Suliniutinut suleqatigiiffiliortoqassaaq naalakkersuinikkut suliniutinut suleqatigiinnik, borgmesterinik kiisalu kommunalbestyrelsiniit tamanit sinniisuunik inuttalimmik, kommunaldirektørit aalajangeeqataasinnaanngitsut peqataaffigisaannik aamma kommunip peqatigiiffiata allaffeqarfiani pisortaq allattaassaaq. Tassunga atatillugu naalakkersuinikkut suleqatigiissitaliortoqassaaq politikkikkut suliniaqatigiiffinnit tamanit aallartitaqartumik. Ataqatigiissarisussamik atorfinitsitsinissamut Naalakkersuisut aningaasaleerusussappata, taamaattumik atorfinitsitsisoqassaaq. Allaffissornikkut suliniutinut suleqatigiit inuttaqartinneqassapput kommunaldirektørinik kommunaldirektørimullu taartaasartunik imaluunniit pisortaqatigiinniit ataasiakkaanniit ingerlatsivinni pisortat arlaat. Suliassaqarfinnut tunngasunik oqaluuserinnittarnerni ingerlatsivinni pisortat allalluunniit suleqatigiinnut ilaasarsinnaapput aalajangeeqataasinnaannatik. Sulisut sulinermi peqataatinneqassapput.
Kommunit taakku pingasuusut naalakkersuisunut piumasaqaatiginiarpaat piaarnerpaamik aamma ukioq 2009 sioqqutingaatsiarlugu paasineqassasoq suliassat suut qitiusumiit kommuninut nutaanut nuutinneqassanersut. Isumaqatigiissutigineqarportaaq suliassat taakku nutaat illoqarfinnut pingasuusunut naligiimmik agguataarneqarnissaat.
Naggataagut isumaqatigiissutigineqarpoq KANUKOKAp piffissalersuinera suleriaasissaliorneralu naapertorlugit sulisoqassasoq, imaalilluguli immikkoortukkuutaat iluannut tunngasunik isumaqatigiissusiortoqassasoq qulaajaasoqassasorlu kattunnissamut ataatsimiititaliassat sulilersinnagit.
Tamanna Kujataata nukittuup ineriartulernissaanut aallaaviugili nutaaq inuit qitiutillugit.
Narsaq, ulloq 25. november 2006.
|
Kiista P. Isaksen |
Simon Simonsen Borgmester Qaqortoq |
Kristine Raahauge Borgmester Nanortalik |
