Borgmesteri Søren Lyberth aamma borgmesteri Hermann Berthelsen ataatsimoorlutik oqaaseqaamminni paasissutissiissutigivaat, Maniitsup Sisimiullu Kommunalbestyrelsii Maniitsumi maajip 2-aniit 4-nut 2006-imi siullermeerlutik ataatsimeeqatigiissimasut.

Suleqatigiinnissamik isumaqatigiissummik Maniitsup Sisimiullu Kommunalbestyrelsiinit februaarimi akuerisaasumik ataatsimiinneq malinnaatitsineruvoq.

Suleqatigiinnissamik isumaqatigiissutip pingaarnertut imarisaasa sisamaasut iluini ataatsimiinnermi suleqatigiissutaasinnaasut immersorlugillu tulleriiaarneqarput:

Namminersornerullutik Oqartussanit suliassanik tigusinissami suleqatigiinnissaq

Maniitsup Sisimiullu Kommunalbestyrelsiisa pingaartutut isigivaat, Namminersornerullutik Oqartussat Kommuninut taakkununnga marlunnut akisussaaffinnik tunniussiartuaarnerat piaarnerpaamik aallartinneqassasoq.

Kommunit marluullutik pissusissamisoorsorivaat, Namminersaornerullutik Oqartussat:

• sanaartornermut tunngasut piaarnerpaamik tunniutissagaat
• ulloq unnuarlu meeqqanut innarluutilinnullu inissianik sanaartornissami aningaasaliissutaasartut kommunenut tunniunneqassasut
• atuisut siunnersuisoqatigiiffilerlugit sumiiffimmi pilersuineq tunniunneqassasoq

Ilisimaarisanik sulisunillu paarlaasseqatigiittarnissami suleqatigiinnissaq

Maniitsup Sisimiullu Kommunalbestyrelsiisa ilisimaarisaminnik sulisuminnillu paarlaasseqatigiittarsinnaaneq tunngavissaqarsorivaat ineriartorfeqarsoralugulu, tulliuttut eqqarsaatigalugit:

• isumaginninnermut ilinniartitaanermut sulisoqarnermullu tunngasutigut politikkissat iliuusissallu suliarineqarnerini
• pisiniarnermi, kiffartuussinissamik isumaqatigiissuteqarnermi, suliassallu neqeroorutiginerini assigiissaarinissamik suliaqarnissami

Sulisut ilinniartitaanerini suleqatigiinnissaq

Kommunalbestyrelsit taakku marluullutik aamma takusinnaalluarpaat, tulliuttutigut periarfissaqarlutik:

• allatseqarfimminni allaffissuarminnilu taamatullu teknikkimut tunngasutigut assigiimmik ilinniartitaanerit
• perorsaanermut tunngasutigut sumiiffimmi ilinniartitsinermik aallartitsinissami
• peqatigiiffiit aqqutigalugit timersornikkut ingerlatsisussanik ilinniartitsinerit qulakkeernissaanni peqataanissami

Inuutissarsiutitigut ineriartortitsinermi suleqatigiinnissaq

Qanittumik qanitariinneq eqqarsaatigalugu tamanna inuutissarsiutitigut ataatsimoortumik ineriartortitsinikkut periarfissatigut atorluarneqartariaqarpoq, pingaartumik makkunatigut:

• takornariaqarnikkut, tassa marluullutik Sermersuarmut periarfissaqartitsiviugamik, sisorarnikkut periarfissaqartitsigamik, aalisarnikkut periarfissat pitsassuit taamatullu umiarsuarlutik takornariartitsinikkut, tamarmilli immikkuullarissunik
• Kangerlussuup eqqaa ilaatigut aatsitassanik misissuiffissaqarfiusoq, piniarnikkullu periarfissanik ineriartortitsiviusinnaasoq
• Kommuneni pisinnaasaqarfiulluartutigut suliffinnik aallartitsiniaasoqarlutik

Suliat ingerlaqqinnissaat

Kommuneni taakkunani ataatsimiititaliat ingerlatsiviillu susassaqartut suliat ingerlateqqillugit immersorlugillu tulleriiaassavaat.

Siullermik tamarmik immikkoorlutik immikkoortortani ataatsimiititalianilu assigiinngitsuni, tamatuma kingorna kommuneni ataatsimiititaliaqatigiit atsimeeqqatigiinnerini naggataatigullu Maniitsup Kommunalbestyrelsiata Sisimiunut ukiup matuma naanerata missaani tikeraarneratigut naammaasinnissutaasumik suliarineqarlutik.

Borgmesterit marluullutik neriuutigivaat, suleqatigiinnissamik anersaaq ilumoortoq, ataatsimeeqqatigiinnerillu kingunerinik aalajangiussanillu piviusunik imaqartoq, kommuneni taakkunani pitsaanerusumik akikinnerusumillu kiffartuussinikkut innuttaasunut iluaqutaasussamik ingerlateqqinneqaannassasoq.

Suleqatigiinnissarput ineriartortillugu ingerlatsillugu, Inatsisartut qulaatiinnarluta nutaanik aningaasartuutaangaatsiartussanik aalajangersaagaluarpata, iluaqutaanaviaranilu akornutaaginnassaaq. Illuatungaatigulli Aaqqissuussaanermut Isumasioqatigiissitat siunnersuutaat naapertorlugu suliassat ingerlateqqinnissaat piareersimaffigaarput, borgmesterit taakku marluk naggasiipput.