Lars Lund, ullumikkut Københavnimi Handelshøjskole-mi nationaløkonomiimi docentiusoq, 2006-imi upernaakkut Nanortallip Kommunianit qinnuigineqarsimavoq aaqqissuussaanermik iluarsaaqqinnissap siunniunneqartup Nanortalimmut sunniutigisinnaasaanik misissueqqullugu.

Lars Lundip nalunaarusiamini inerniliussaasa ilagaat pissutsit imminnut akerleriittut marluujumaartut: Iluarsaaqqinnissaq Kujataa ataatsimut isigalugu aningaasatigut isertitaqarnerulissutaassasoq, illua'tungaatigulli Qaqortumut eqiterussinikkut Nanortalimmi isertitanik Qaqortumut nuussinerussalluni.

"Taamaattumik sunniutini siullerni ilorraap tungaanut sunniutit eqqarsaatersuutaannaasorujussuupput. Qaqortumi isertitaqarnerulerneq Nanortalimmi piumaneqassutsimut suliassanullu malunnaatilimmik sunniuteqarunanngilaq," Lars Lund allappoq.