Siusinnerusukkut Nuup kujataani kommuninik, Paamiut Kommuniannik Ivittuullu kommuniannik, kattunnissaq siunertaralugu isumaqatigiinniarnissaq akuerineqarsimavoq. Kommunit taakku marluk tunumi kommunit ilanngullugit suleqatigiinnissamik ammallutik siusinnerusukkut oqaatigaat. Nuummi Kommunalbestyrelsip aalajangernermigut nunarsuarmi kommunit kattussuunnissaasa annersaasa ilaat ammaffigaa.

Kommunit kattussuutilersussat tallimat taakku katillugit 635.600 km2 annertussuseqarput, katillugillu 21.000 missaannik innuttaqarlutik. Kommune nutaassaq taanna Aaqqissuussaanermut Isumalioqatigiissitat pilersaarutaat naapertorlugu ulloq 1. maj 2009-mit atuutilissaaq.

- Kattussuunnissaq pissanganartoq maanna aallartilerparput. Kommunit arlallit tamarmik immikkuullarissuteqartut arlalissuarnillu nukittufillit maanna kattuttussanngorput. Kattussuunnerit annertuumik ingerlatsinerup iluaqutissartaanik iluaquteqassaaq, tamannalu illoqarfiit innuttakitsut innuttaannik periarfissaasimanngitsunik aammaassissaaq.

Kommunit nutaat qarasaasiaqarnikkut nutaaliaasumik ingerlatsinissamik anguniarnermikkut aningaasartuutit qaffatsinngikkaluarlugit illoqarfiit avinngarusimasut ullutsinnut naleqquttumik kommunimit sullinneqarnissaat qulakkeerniarparput, Nuup borgmesteria Agnethe Davidsen oqarpoq.

Paamiut Ivittuullu kattuteqatigiinissaannut isumaqatigiinniarnernut atatillugu ilaatigut isiginnaarutit atorlugit ataatsimeeqatigiinnermut atortorissaarutinik pisisoqareersimavoq, taamaalilluni atorfilittat politikkerillu angalanngikkaluarlutik ataatsimiissinnaalerlutik.

Aqqissuuseqqinnermut atatillugu pinngortitamik nakkutilliineq tamakkiisumik kommuninut nuunneqassasoq naatsorsuutigineqarmat, Ittoqqortoormiillu Kommuniat tunup avannaarsuani nunamut eqqissisimatitamut annertuumik attuumassuteqarmat, kommuni nutaassaq nunamik eqqissisimatitamik akisussaaffimmik tigusinissaminut ammavoq.