KANUKOKA-p siulittaasuata Søren Alaufesenip naalakkersuisullu siulittaasuata Hans Enoksenip isumaqatigiissummik atsioqatigiissuteqarneratigut pisortat suliassaqarfiisa aaqqissuussaanerannik iluarsaaqqinnissap piareersarneqarnerani immikkoortoq pingaartoq nutaaq aallartippoq.

Suliassaqarfiit Namminersornerullutik Oqartussat kommunillu akornanni nuunneqarsinnaasut suussusersiniarlugit suleqatigiissitat katillutik 22-iusut sulisinneqassapput, taakkunannga 18-it septembarip naannginnerani aallartereersimassallutik.

Suleqatigiissitat qulaajaanerminni naammassisatik kingusinnerpaamik 1. februaari 2008 Namminersornerullutik Oqartussat KANUKOKA-llu iluarsaaqqinnissamut aqutsisoqatigiivinut tusarliutissavaat. Suliaallu politikkikkut naliligassanngorlugit aalajangiiffigisassanngorlugillu kommuninut saqqummiunneqassapput.

Søren Alaufesenip isumaqatigiissuteqarnermi erseqqissarpaa kommunit tungaannit isigalugu kommunit kattunnissaanni siunertaammat inuiaqatigiit sullinneqarneranni kommunit annertunerusunik akisussaaffeqalernissaat. „Kommunillu tunngavissinneqartariaqarput sullissinermik pitsanngorsaanissaminnut. Tamannarpiarmi siunertaavoq," KANUKOKA-p siulittaasua oqarpoq.

KANUKOKA-p siulittaasua naalakkersuisullu siulittaasuat isumaqatigiissut atsiugartik tigummillugu naalakkersuisut ataatsimiittarfianni nunap assingata kommuninik nutaassanik aggornilersukkap saani.