Nuup Kommuneata akissutaa

Nuup Kommunea tallimanngornermi 16. juni 2006-imi Aaqqissuussaanermik iluarsaaqqinneq pillugu tusarniaanermik ilanngunneqartumik Naalakkersuisunit tigusaqarpoq. Kingusinnerpaamik 15. august 2006-imi akeqqusisoqarpoq.

Allatseqarfiup inassutaa

Allatseqarfiup paasissutissat nassiunneqartut misissorpai taakkulu pingaarnertut qulequttanut arlalinnut immik-koortiterneqarnissaat toqqarlugu. Tamanna tunuliaqutaralugu Allatseqarfiup Aningaasaqarnermut Inuussutissarsiornermullu Ataatsimiititaliamut inassutigissavaa Aningaasaqarnermut Inuussutissarsiornermullu Ataatsimiititaliap Kommunalbestyrelsimut kaammattuutigissagaa:

Kommunit naligiit

Kommunit 18-iusut taakku kommuninut sisamanut naligiissunut ataatsimoortinneqarnissaat pillugu inatsisissatut siunnersuut 2007-imi upernaakkut ataatsimiinnermi Naalakkersuisut saqqummiutissavaat:

Inassuteqaat

• Nuup Kommunea illoqarfiit pingaarnersaattut inissisimaannassasoq.

Ataatsimoortitsinermut ataatsimiititaliaq

Kommunini ataatsimoortitsinermut ataatsimiititaliat pillugit inatsisissatut siunnersuut 2007-imi Inatsisartut upernaakkut ataatsimiinneranni Naalakkersuisut saqqummiutissavaat.

Inassuteqaat

• Ataatsimoortitsinermut ataatsimiititaliamik piaartumik pilersitsisoqassasoq.

Nunap immikkoortuani sinniisut /inuit ataasiakkaat sunniuteqarsinnaanerat

Naalakkersuisut kingusinnerpaamik 2008-mi Inatsisartut upernaakkut ataatsimiinneranni siunnersuuteqassapput nunap immikkoortuani sinniisut kommunalbestyrelsissani qanoq qularnaarneqassanersut:

Inassuteqaat

• Misissuineq tamanna KANUKOKA, aamma aqutsisoqatigiit pilersinneqartut suleqatigiissitallu katiterluakkat qanimut suleqatigalugit pissasoq.
• Ilanngutsitseriaatsit nutaat misissorneqassasut.
• Meeqqat inuusuttullu pisinnaatitaaffii misissuinermi tassani ilanngunneqassasut.

Ataatsimut IT-mik ingerlatseqatigiiffik

Naalakkersuisut peqquneqassapput KANUKOKA suleqatigalugu ataatsimut IT-mik periutsinik aamma ataatsimut ingerlatseqatigiiffimmik pilersitsinissamut periarfissanik misissueqqullugit.

Inassuteqaat

• Taamatut pilersitsinissamik piareersaalluni piaartumik aallartisaasoqassasoq piviusunngortitissoqassasorlu / immaqalu suliaq suliarinnittussarsiuullugu.

Piginnaatitaanerit

Illoqarfinni nunaqarfinnilu aqutsisuni piginnaatitaanerit nukittorsarneqarnissaannut periarfissanik misissuinermi angusat Naalakkersuisunit kingusinnerpaamik 2008-mi Inatsisartut upernaakkut ataatsimiinneranni saqqummiunneqqassapput.

Inassuteqaat

• Piginnaatitaaffeqarfiit kommuninut tunniunneqartus-satut naatsorsuutigineqartut tamarmik misissoqqissaarneqassasut. Kommunit ingerlataqarfinnik tigusiinnartussaanngillat makkuninngali ilusilersueqataanissamut periarfissinneqavissallutik:

• Periutsit
• Ineriartortitsinissamik pilersaarutit
• Sulianik nutaanik piviusunngortitsinerit

Piginnaatitaassutsit nuna nunarsuarlu tamakkerlugu eqqarsaatigalugit isigineqassasut. Tassa, piginnaatitaannginnerit kingunerisinnaasaat aamma misissoqqissaarneqassallutik.

Piffissamut pilersaarut

Piffissamut pilersaarummut saqqummiunneqartumut nalinginnaasumik oqaaseqaatit.

Inassuteqaat

• Piffissamut pilersaarut pisariitsumik suliarineqarsinnaasumillu naleqqussarneqassaaq.
• Ataatsimoortitsinermut ataatsimiititaliat pilersinneqartut aamma sulinermi "pingaarutilittut" ilaanissaat pingaaruteqarpoq.

Amigaatit

Allattoqarfimmit oqaatigineqarpoq Naalakkersuisut tusarniaanermi inuiaqatigiinni aningaasaqarnikkut misissueqqissaarnermut kommuninilu namminersornermut kingunerisassanut tunngasut pingaarutillit eqqaaneqarsimanngitsut.

Inuiaqatigiinni aningaasaqarnikkut misissueqqissaarnerit

Aaqqissuusseqqinnermi kingunerisassat aningaasaqarnikkut suli misissoqqissaarneqarsimanngillat.

Inassuteqaat

• Allannguutissatut siunnersuutitigineqartut inuiaqatigiinni aningaasaqarnikkut misissoqqissaarneqassasut.

Kommunit namminersornerat

Kommunit namminersornerat millisinneqaratarsinnaaqaaq, tassami akileraartarnermut tunngasut kommunit sunniuteqarnerisa avataaniilissammata maannalu kommunimi akileraarutip qaffasissusianik aalajangersaasarneq atorunnaassalluni.

Inassuteqaat

• Akileraartarnermut tunngasut allanngortinneqarnerisa kingunerisassaat misissoqqissaarneqassasut.

Aningaasaqarnermut Inuussutissarsiornermullu Ataatsimiititaliap aalajangiinera 22.06.06-imeersoq

Aningaasaqarnermut Inuussutissarsiornermullu ataatsimiititaliap inassuteqaatit kommunalbestyrelsimut akuereqqullugu inassuteqaatigai, aammalu kommunip akileraarnermut procenterititaasa aalajangersaaffigineqartarnerat kommuniniiginnassasoq.

Inerniliineq

Kommunalbestyrelsip isumaqatigiissup inassuteqaatit akuerai, inassuteqaatip saniatigut ataatsimut imaattunik oqaaseqaateqarluni;

Kommunimi akileraarnermut procentip aalajangersarneqartarnera kommuniniiginnassasoq.
najukkami inuussutissarsiutitigut pilersitsinermik ineriartortitsinermillu tapersiisarneq aalajangiusimaneqassasoq,
kommunit killeqarfii nalilersoqqinneqassasut.
Nunaqarfinni aqutsisut siunissami qanoq inissisimanissaat oqaluuserineqassasoq.
Suliassanik kommuninut nuussinerit malinnaaffigeqqissaarneqassasut.
Kommunit nammineersinnaatitaanerat annikillisinneqassanngitsoq.
Angallannermut tunngasut misissoqqissaarneqassasut.

Tamakkua saniatigut Atassut ikinnerussuteqarluni oqaaseqaateqarpoq;
Nuup Kommunea kattuteqateqanngikkaluarluni kisimiilluarsinnaasoq.